FRAMKVÆMDASTJÓRI Á FARALDSFÆTI - FRÆÐSLUERINDI ÞANN 7. 0KT

Miðvikudaginn 7. október nk. flytur Kristinn H. Þorsteinsson fræðsluerindi hjá Lionsklúbbnum Víðarr.  Dagskráin hefst klukkan 18.00 í Lionssalnum að Hlíðasmára 14.

Nú stendur yfir áratugur Sameinuðu þjóðanna um endurheimt og verndun vistkerfa um allan heim, í þágu fólks og náttúru. Það er í senn metnaðarfullt og mikilvægt verkefni að auka verulega útbreiðslu birkiskóga og birkikjarrs, en nú er birki aðeins að finna á um 2% af flatarmáli landsins.

Í erindi ætlar Kristinn að stikla á stóru, í máli og myndum, um mikilvægi jarðvegsverndar, endurheimt vistkerfa og kolefnisbindingu með birki. Jafnframt mun hann kynna landsátakið „Söfnum og sáum“ sem er  sem er hluti af svonefndri Bonn-áskorun
Kristinn er verkefnastjóri landsátaksins og framkvæmdastjóri Skógræktarfélags Kópavogs. Hann hefur haldið fjölda fyrirlestra um ræktun og önnur umhverfismál, haft umsjón með sjónvarpsþáttum og skrifað greinar í blöð og tímarit.

Vatnsendahlaup HK 2026

Vatnsendahlaup HK var haldið í þriðja sinn fimmtudaginn 10. september 2026 kl. 18. Hlaupið hófst við Kórinn við Vallakór í Kópavogi og lá um Vatnsendaheiði og Guðmundarlund.

Hlaupið var 10 km utanvegahlaup á fjölbreyttum stígum. Áhersla var lögð á gleði og þátttöku fremur en keppni eingöngu. Eitt af helstu markmiðum hlaupsins er að kynna utanvegahlaup fyrir yngri kynslóðinni. Í því skyni hefur verið boðið upp á sérstakt ungmennagjald til að lækka þröskuldinn fyrir þátttöku.

Mótið gekk í alla staði vel og var mótshöldurum til mikils sóma.

Skógræktarfélag Kópavogs hefur frá upphafi lagt verkefninu lið.

SVEPPAFRÆÐSLA Í GUÐMUNDARLUNDI 5. SEPTEMBER

Laugardaginn 5. september stendur Náttúrusafn Kópavogs í samstarfi við Skógræktarfélag Kópavogs og Sveppafélagið fyrir fræðslu frá kl. 11-13 í Guðmundarlundi.

Við hittumst við Gamla húsið (húsið næst bílastæðinu) kl. 11 þaðan sem Jóhannes Bjarki Urbancic, forsvarsmaður Sveppafélagsins og Hlynur Steinsson sérfræðingur hjá Náttúrusafninu leiða fræðsluna.

Takið með körfu eða annað hart ílát undri sveppina og lítinn hníf eða vasahníf til að hreinsa þá. Gaman er fyrir þau sem eiga að hafa sveppabók og stækkunargler meðferðis.

Viðburðurinn hentar öllum aldri og er frábært tækifæri fyrir fjölskylduna til samveru og útivistar. Komið klædd eftir veðri og í góðum skóm.

Aðgangur er ókeypis.

Öll velkomin!

Fjölskyldustundir á laugardögum eru styrktar af Menningar og mannlífsnefnd Kópavogsbæjar.

Um Sveppafélagið:

Sveppafélagið var stofnað í febrúar 2025 í þeim tilgangi að vera umboðmaður og bakhjarl sveppa. Það felur í sér að vekja athygli á málefnum sveppa, styðja við sjálfbæra nýtingu þeirra, auka við þekkingu á sveppum og tala fyrir verndun þeirra þar sem við á.

MUGISON Í GUÐMUNDARLUNDi 23. ágúst 2026

Maðurinn sem spilar í görðum, skógum, lautum, við sjóinn og á öðrum fallegum og áhugaverðum stöðum mætti í Guðmundarlund í Kópavogi sunnudaginn 23. ágúst. Hann kom, sá og sigraði.

Mugison fer ekki alltaf troðnar slóðir í tónleikahaldi sínu.

Dagana fyrir auglýstan viðburð var veðurspáin ekki góð, það stefndi í rigningu og aftur rigningu - Það gekk ekki eftir.

Þegar Mugison steig á svið í Guðmundarlundi brast á bongóblíða. Seiðandi hljómarnir frá Mugison svifu á milli trjánna í Guðmundarlundi og fylltu hvern krók og kima af einstakri stemningu. Skógurinn myndaði magnaða umgjörð og gaf staðnum töfrablæ.

Undir lokin sté hans betri helmingur, Rúna Esradóttir, á svið og söng með Mugison við góðar undirtektir viðstaddra.

Takk, Mugison og Rúna, þið eigið heiður skilið fyrir framlag ykkar.

Skógar fá annan blæ þegar tónlistin og náttúran renna saman í eitt og skapa ógleymanlegar töfrastundir. Þessi einstaka upplifun, sem Mugison og Rúna færðu gestum í Guðmundarlundi, sýnir hvernig listin getur breytt rigningu í blíðu og magnað upp skóginn enn frekar sem töfrastað.

Sumarskemmtun FEBK í Guðmundarlundi 2026

Árleg sumarskemmtun FEBK, Skógræktarfélags Kópavogs og Kópavogsbæjar var haldin í Guðmundarlundi þriðjudaginn 23. júní. Góð þátttaka var í ferðinni og nutu gestir samveru, tónlistar og veitinga úti sem inni.

Hægt er að skoða frétt um sumarskemmtun FEBK á heimasíðu Kópavogs: https://www.kopavogur.is/lif-i-baenum/frettir-og-tilkynningar/sumarskemmtun-i-gudmundarlundi
Einnig er frétt á vef Félags eldri borgara í Kópavogi: https://febk.is/skemmtiferd-i-gudmundarlund-2/

MINIGOLFVÖLLURINN Í GUÐMUNDARLUNDI Í KÓPAVOGI KEMUR VEL UNDAN VETRI

Einn glæsilegasti minigolfvöllur landsins kemur vel undan vetri. Völlurinn er iðagrænn og fagur eftir rigningu síðustu daga og kylfingar ánægðir með ástand hans.

Þrátt fyrir smæð sína er hann einkar áhugaverður. Hann hentar jafnt byrjendum sem reyndari kylfingum. Líkur eru miklar á að ná holu í höggi í Guðmundarlundi.

Völlurinn stendur öllum opinn sem vilja njóta og þarf ekki panta eða bóka tíma því hann rúmar marga í senn.

Ekkert gjald er tekið fyrir að nota völlinn en hver og einn verður að taka með sér eigin golfkylfur og kúlur.

Minigolf völlurinn er sannkallaður sælureitur fyrir alla fjölskylduna sem er staðsettur stutt frá ys og þys bæjarins í yndislegri náttúru.

ÞAÐ ER MIKIÐ VATN Á FERÐ Í GUÐMUNDARLUNDI

Vegurinn upp í lundinn hefur verið lokaður neðan við hesthúsin, þar sem hluti hans er ófær minni bílum og vatnsdýpt nær sums staðar allt að 80 cm.

Vegurinn er mjög viðkvæmur um þessar mundir, afar holóttur og þolir ekki mikla umferð. Umferð við þessar aðstæður getur valdið verulegum skemmdum.

Því er ekki annað í stöðunni en að loka veginum á meðan rignir svona mikið, til að koma í veg fyrir frekari eyðileggingu – enda var hann orðinn nægilega illa farinn fyrir.

Björgvin Örn Eggertsson hlaut hvatningaverðlaun skógræktar 2026

Hvatningaverðlaun skógræktar 2026 voru veitt við hátíðlega athöfn í Garðyrkjuskólanum á Reykjum í Ölfusi á Alþjóðlegum degi skóga þann 21. mars.

Er þetta í þriðja sinn sem verðlaunin eru afhent, en þau eru veitt árlega til einstaklinga, hópa, fyrirtækja, félaga eða stofnana sem unnið hafa óeigingjarnt starf í þágu skógræktar á Íslandi. Markmið með afhendingu þeirra er að hvetja skógræktarfólk til áframhaldandi starfa og vekja athygli á því margþætta góða skógarstarfi sem unnið er að um land allt.

Nánar má lesa frétt á á heimasíðu Skógræktarfélags Íslands: https://www.skog.is/hvatningarverdlaun-skograektar-2026-afhent/

Hvatningarverðlaun afhent á alþjóðlegum degi skóga 21. mars 2026

Hvatningarverðlaun afhent á alþjóðlegum degi skóga

Hvatningaverðlaun skógræktar 2026 verða formlega veitt við hátíðlega athöfn í Garðyrkjuskólanum að Reykjum í Ölfusi á alþjóðlegum degi skóga, laugardaginn 21. mars kl. 15.30.

Nánari upplýsingar má finna á heimasíðu Lands og skóga:
https://island.is/s/land-og-skogur/frett/hvatningarverdlaun-afhent-a-althjodlegum-degi-skoga

Fagráðstefna skógræktar 2026

„Lífið í skóginum“ þema Fagráðstefnu skógræktar 2026

Fagráðstefna skógræktar 2026 fer fram á Stracta Hótel Hellu 18. og 19. mars. Þema fyrri dags ráðstefnunnar að þessu sinni verður lífið í skóginum. Seinni daginn verða fjölbreytt erindi um ýmis skógarmálefni.

Dagskrá fagráðstefnunnar hefur ekki verið birt en það mun væntanlega gerast fljótlega og verður birt á eftirfarandi slóð.

https://island.is/s/land-og-skogur/vidburdir/lifid-i-skoginum-thema-fagradstefnu-skograektar-2026-19-3-2026

Alþjóðlegur dagur jarðvegs – heilbrigður jarðvegur í þéttbýli

Fimmti desember er alþjóðlegur dagur jarðvegs (World Soil Day) haldinn undir forystu FAO, matvæla- og landbúnaðarstofnunar Sameinuðu þjóðanna. Markmiðið með deginum er að vekja athygli á mikilvægi jarðvegs fyrir lífríki jarðar, loftslagsmál, framleiðslu á mat og sjálfbæra nýtingu náttúrunnar. Þótt sjaldan sé talað um jarðveginn er hann ein af grunnstoðum vistkerfa og ein sú auðlind sem skiptir mannkynið mestu máli. Að þessu sinni er sjónum beint sérstaklega að jarðvegi í þéttbýli.

Frétt þessi kemur frá Land og skógum og á heimasíðu þeirra má lesa meira: https://island.is/s/land-og-skogur/frett/althjodlegur-dagur-jardvegs-heilbrigdur-jardvegur-i-thettbyli

JÓLASKÓGUR Í GUÐMUNDARLUNDI Á SUNNUDÖGUM

JÓLASKÓGUR Í GUÐMUNDARLUNDI Á SUNNUDÖGUM

Kópavogsbær býður upp á ókeypis fjölskyldudagskrá í jólalundi alla sunnudaga á aðventunni. Jólalundurinn sem er í Guðmundarlundi er opinn frá 12-15.

Ekki missa af jólaballinu hennar Rófu, tengingakapphlaupi Giljagaurs, danskennslu með Tásu, sveimandi ævintýraverum, blaðskellandi jólasveinum, rjúkandi heitu kakói, splunkunýjum ratleikjum, jólaföndri í náttúrunni og því að kíkja í fataskápinn í Grýluhelli.

Dagskráin er endurtekin yfir daginn svo að öll ættu að komast að og koma sér í jólastemninguna með ævintýraverum og jólasveinum. Ratleikur, danskennsla, búningamátun, leikir og föndur verður í boði meðan á opnun stendur og hægt verður að kaupa heitt kakó og piparkökur.

Tímasetningar

Jólaball Rófu er kl. 12:20, 12:50, 13:20, 13:50 og 14:20.

Örtónleikar barnakóra í Kópavogi eru kl. 12:30 við inngang, 12:50 við kaffihúsið, 13:10 við leiktækin, 13:40 við kaffihúsið og 14:10 við inngang.

Við hlökkum til að sjá ykkur og njóta fölskylduvænnar samveru í fallegu náttúrunni okkar hér í Kópavogi.

Viðburðurinn er styrktur af menningar- og mannlífsnefnd Kópavogs.

HÖGGVIÐ YKKAR EIGIÐ JÓLATRÉ

HÖGGVIÐ YKKAR EIGIÐ JÓLATRÉ - FJÖLSKYLDUSTUND Í SKÓGINUM

Jólatrjáasala verður á Fossá í Hvalfirði tvær helgar í desember 2025 þ.e laugardaginn 6. og sunnudaginn 7. desember og aftur 13. og 14. desember milli kl 11:00 og 15:00

Einstaklingum sem og starfsmannafélögum eða öðrum hópum gefst nú, eins og undanfarin ár, frábært tækifæri til að koma að Fossá í Kjós og ná sér í jólatré.

Jólatrén eru seld eftir hæð þeirra. Tré allt að 1,5 m. á hæð kostar 6900,-. Hæðaflokkur 1,5 – 2 m. er á 9200,- og 2 – 2,5 m. á 14300,-

Þegar komið er að Fossá er hægt að fá lánaða sög og leiðbeiningar starfsfólks um hvar megi sækja tré og hvernig skuli bera sig að. (Þeir sem eiga góða sög eru hvattir til að taka hana með sér).

Þegar tréð hefur verið valið og fellt stendur til boða aðstoð við að pakka trénu inn í net sé þess óskað. Hægt er að greiða fyrir tréð/ trén hvort sem er með peningum, korti eða leggja beint inn á reikning.

Öll vinna við sölu trjánna er unnin í sjálfboðavinnu og er afrakstur sölunnar notaður til að gróðursetja fleiri tré á Fossá og styrkja svæðið enn frekar sem útivistarsvæði.

Skógurinn að Fossá er opinn skógur og öllum velkomið að njóta hans árið um kring.

Hvernig kemst ég að Fossá?

Jörðin Fossá er frekar innarlega í Hvalfirði. Beygt er af Vesturlandsveginum inn í Hvalfjörð að sunnanverður, skammt frá Hvalfjarðargöngunum.

Leiðin liggur inn Hvalfjörðinn og er farið yfir Laxá, framhjá Hálsi í Kjós , Hvammsvík, og Hvítanesi þar sem gamla Breta Bryggjan hangir enn uppi.

Næsta jörð við Hvítanes er Fossá og er svæðið vel merkt þegar komið er að.

Allir eru velkomnir í ævintýraland jólatrjáa að Fossá. Nánari upplýsingar er hægt að fá í gegnum síma 839-6700 eða í gegnum netfangið skogkop@gmail.com

Eigendur jarðarinnar eru skógræktarfélögin í Kópavogi, Mosfellsbæ, á Kjalarnesi og í Kjósarsýslu.

SÖFNUN BIRKIFRÆS Í Mosfellbæ 30. september 2025

Land og skógur óskar eftir stuðningi landsmanna við að breiða út birkiskóga landsins í anda Bonn-áskorunarinnar.

Sem kunnugt er stendur yfir áratugur Sameinuðu þjóðanna um verndun og endurheimt vistkerfa um allan heim í þágu fólks og náttúru. Íslensk stjórnvöld hafa tekið svonefndri Bonn-áskorun sem er alþjóðlegt átak um endurheimt skóga undir hatti alþjóðlegu náttúruverndarsamtakanna IUCN í samstarfi við fleiri aðila. Markmið Íslands í þessari áskorun er að árið 2030 vaxi birkiskógar á 5% landsins, í stað 1,5% nú.

Verkefnið, Söfnum og sáum birkifræi, er liður í því að Ísland nái þessu markmiði. Tilgangurinn er að efla útbreiðslu birkiskóga, meðal annars með því að virkja almenning til söfnunar og dreifingar birkifræs en einnig að veita fræðslu til félagasamtaka, skóla, fyrirtækja og stofnana um vernd og endurheimt birkiskóga.

Átakinu í ár verður hleypt formlega af stokkum í Mosfellsbæ þriðjudaginn 30. september kl 17:30 og verða það Lionsklúbburinn Úa, Lkl. Mosfellsbæjar og Lkl. Grindavíkur sem hefja söfnunina. Hittingur verður á bílaplani fyrirtækisins Villimeyjar Leiruvegi 2, 162 Reykjavík  Þaðan verður gengið spölkorn og fræi safnað í nálægum birkireit.  

Sérfræðingur frá Skógræktarfélagi Íslands kynnir verkefnið og fræðir um tínslu og sáningu birkifræs.