DAGSKRÁ AÐALFUNDAR

Stjórn Skógræktarfélags Kópavogs boðar til aðalfundar félagsins þriðjudaginn 12. mars 2024
Fundurinn hefst kl 19:30 á Leiðarenda 3 í Guðmundarlundi í Kópavogi.

 

Dagskrá

1. Fundarsetning

2. Kosning fundarstjóra og fundarritara

3. Skýrsla stjórnar

4. Reikningar félagsins

5. Skýrslur nefnda

6. Félagsgjald

7. Lagabreytingar

8. Kosning stjórnar

9. Kosning skoðunarmanna reikninga.

10. Önnur mál

Lög félagsins má nálgast á vef félagsins www.skogkop.is
Á eftirfarandi slóð má finna staðsetningu húsins í Guðmundarlundi : https://skogkop.is/kort-og-mynd 

Með kveðju
Stjórn Skógræktarfélags Kópavogs

 

 

HÖGGVIÐ YKKAR EIGIÐ JÓLATRÉ - FJÖLSKYLDUSTUND Í SKÓGINUM

Jólatrjáasala verður á Fossá í Hvalfirði tvær helgar í desember 2023 þ.e laugardaginn 2. og sunnudaginn 3. desember og aftur 9. og 10. desember milli kl 11:00 og 15:00

Einstaklingum sem og starfsmannafélögum eða öðrum hópum gefst nú, eins og undanfarin ár, frábært tækifæri til að koma að Fossá í Kjós og ná sér í jólatré.

Jólatrén eru seld eftir hæð þeirra. Tré allt að 1,5 m. á hæð kostar 6500,-. Hæðaflokkur 1,5 – 2 m. er á 8500,- og 2 – 2,5 m. á 13000,-

Þegar komið er að Fossá er hægt að fá lánaða sög og leiðbeiningar starfsfólks um hvar megi sækja tré og hvernig skuli bera sig að. (Þeir sem eiga góða sög eru hvattir til að taka hana með sér).

Þegar tréð hefur verið valið og fellt stendur til boða aðstoð við að pakka trénu inn í net sé þess óskað. Hægt er að greiða fyrir tréð/ trén hvort sem er með peningum, korti eða leggja beint inn á reikning.

Öll vinna við sölu trjánna er unnin í sjálfboðavinnu og er afrakstur sölunnar notaður til að gróðursetja fleiri tré á Fossá og styrkja svæðið enn frekar sem útivistarsvæði.

Skógurinn að Fossá er opinn skógur og öllum velkomið að njóta hans árið um kring.

Hvernig kemst ég að Fossá?

Jörðin Fossá er frekar innarlega í Hvalfirði. Beygt er af Vesturlandsveginum inn í Hvalfjörð að sunnanverður, skammt frá Hvalfjarðargöngunum.

Leiðin liggur inn Hvalfjörðinn og er farið yfir Laxá, framhjá Hálsi í Kjós , Hvammsvík, og Hvítanesi þar sem gamla Breta Bryggjan hangir enn uppi.

Næsta jörð við Hvítanes er Fossá og er svæðið vel merkt þegar komið er að.

Allir eru velkomnir í ævintýraland jólatrjáa að Fossá. Nánari upplýsingar er hægt að fá í gegnum síma 839-6700 eða í gegnum netfangið skogkop@gmail.com

Eigendur jarðarinnar eru skógræktarfélögin í Kópavogi, Mosfellsbæ, á Kjalarnesi og í Kjósarsýslu.

BIRKIFRÆTÍNSLA Í VESTURBYGGÐ

MEST ER UM BIRKIFRÆ Í VESTURBYGGÐ ÞETTA ÁRIÐ

Sem kunnugt er stendur yfir áratugur Sameinuðu þjóðanna um verndun og endurheimt vistkerfa um allan heim í þágu fólks og náttúru. Íslensk stjórnvöld hafa tekið svonefndri Bonn-áskorun sem er alþjóðlegt átak um endurheimt skóga undir hatti alþjóðlegu náttúruverndarsamtakanna IUCN í samstarfi við fleiri aðila. Markmið Íslands í þessari áskorun er að árið 2030 vaxi birkiskógar á 5% landsins, í stað 1,5% nú.

LANDSVERKEFNIÐ „SÖFNUM OG SÁUM „ SEM HÓFT ÁRIÐ 2020 KALLAR EFTIR FRÆJUM

Það er misjafnt á milli ára hversu mikið framboð er af birkifræi. Í ár er almennt lítið framboð á birkifræi í flestum landshlutum að undskildri Vesturbyggð en þar má víða finna mikið magn fræja.

Nú er fræsöfnunartímanum senn að ljúka og verður gert sérstakt átak til að safna birkifræi í Vesturbyggð áður en vetur gengur í garð af fullum þunga og eru allir sem vettlingi geta valdið hvattir til að taka þátt.

Laugardaginn 18. nóvember fer fram fræðsla um söfnun fræja og sáningu á þremur stöðum í Vesturbyggð.

Kl. 11:00 ætla Bíldælingar og nærsveitungar að koma saman á útsýnispallinum á varnargarðinum og njóta fræðslu og tína fræ.

Kl. 13:00 hefst dagskráin í Tálknafirði og kl. 15:00 á Patreksfirði.

Fræðslan verður í höndum verkefnisstjóra Landsátaksins Kristins H. Þorsteinssonar en hann er starfar jafnframt sem framkvæmdarstjóri Skógræktarfélag Kópavogs.

ALLIR GETA ORÐIÐ FRÆSAFNARAR OG FRÆGJAFAR

Landsátakið gefur almenningi færi á að leggja sitt af mörkum til landbótastarfs og stuðlar þannig að auknum skilningi á mikilvægi landbótastarfs í baráttunni gegn loftslagsbreytingum.

Verkefnið að „SAFNA OG SÁ „ hentar flestum aldurshópum vel og sérstaklega nefna að börnin skynja mikilvægi verkefnisins, eru fljót að tileinka sér vinnubrögðin, og vinna hratt og hafa gaman af. Það er því mikilvægt að að gefa börnum tækifæri til að koma og vera þátttakendur í þessu mikilvæga verkefni. Öllum fræjum sem verður safnað verður sáð í Vesturbyggð af skólabörnum, félagsamtökum sem og öðrum sem vilja taka þátt.

Verkefnið gefur almenningi færi á að leggja sitt af mörkum til landbótastarfs og stuðlar þannig að auknum skilningi á mikilvægi landbótastarfs í baráttunni gegn loftslagsbreytingum.

Átakið í Vesturbyggð er samstafsverkefni: Landsátaksins „Söfnum og sáum“ Vesturbyggðar, skógræktarfélagana og kirkjunnar í Vesturbyggð og fræðslusviðs biskupsstofu.

Skógræktarfélag Bíldudals

Skógræktarfélag Patreksfjarðar

Skirnarskógar

birkiskogur.is


BIRKISÖFNUN HAFIN

Gleði og eftirvænting skein úr hverju andliti þátttakenda þegar landsátak Skógræktarinnar og Landgræðslunnar um söfnun og sáningu birkifræs hófst formlega miðvikudaginn 13. september. Fyrstu skrefin voru tekin með fræðslu tveggja sérfræðinga á sviði birkis, þeirra Þorsteins Tómassonar og Aðalsteins Sigurgeirssonar. Þeir félagar fjölluðu um birkið frá ýmsum hliðum og að því loknu var gengið út í góða veðrið og birkifræjum safnað.

Markmið verkefnisins

Verkefnið Söfnum og sáum birkifræi er liður í því að breiða út á ný birkiskóglendi sem þakti við landnám að minnsta kosti fjórðung landsins en er nú einungis um 1,5 prósent. Markmið stjórnvalda í Bonn-áskorun Evrópulanda er að ná þessu hlutfalli upp í fimm prósent árið 2030. Mikilvægt er að sem flestar hendur leggi hönd á plóginn og því er biðlað til almennings að safna fræi og annað hvort sá því á eigin spýtur á beitarfriðuðum svæðum þar sem vilji er til að klæða landið skógi eða skila fræinu inn til söfnunarinnar.

Fræðsla og önnur aðstoð

Landsátakið býður upp á námskeið, fyrirlestra og fræðslu er lýtur að birki, söfnun fræja og sáningu fyrir t.d. skóla, félagasamtök og fyrirtæki. Nálgast má upplýsingar um það sem í boði er með fyrirspurn í gegnum netfangið birkiskogur@gmail.com

Verkefnastjóri Landsátaksins er Kristinn H. Þorsteinsson framkvæmdastjóri Skógræktarfélags Kópavogs með síma 839-6700.

Skógræktarfélag Kópavogs hlaut landgræðsluverðlaun 2023 fyrir endurheimt birkivistkerfa, söfnun og sáningu á birkifræi. Nánari upplýsingar um Landgræðsluverðlaunin má finna á eftirfarandi slóð: https://land.is/landgraedsluverdlaunin-2023/

Viltu fá birkifræ til að sá?

Þetta árið er heldur lítið framboð á fræi í flestum landshlutum. Einhvern reyting er alls staðar að finna ef vel er leitað, líklega minnst á Norður- og Austurlandi, heldur betra sunnan- og vestanlands en eina svæðið þetta árið sem vitað er um mikið fræ er á sunnanverðum Vestfjörðum, einkum í Vesturbyggð. Nokkurt magn er til af birkifræi í frægeymslum Skógræktarinnar og ástæða til að hvetja fólk til að nýta sér það og fara út og sá, ekki síst þar sem lítið fræ er að finna. Skógræktin býður 100 gramma pakkningar sem sendar verða í pósti meðan birgðir endast. Hafið samband við Valgerði Jónsdóttur í Vaglaskógi með netfanginu valgerdur@skogur.is.

 

LANDSÁTAKIÐ SÖFNUM OG SÁUM BIRKIFRÆI 2023 HEFST Í HEIÐMÖRK 13. SEPTEMBER

Skógræktarfélag Reykjavíkur býður til formlegrar opnunar á landsátaki Skógræktarinnar og Landgræðslunnar í söfnun og sáningu á birkifræi fyrir árið 2023 miðvikudaginn 13. september kl. 18:00.

Dagskráin hefst við Elliðavatnsbæinn í Heiðmörk. Þar verður stutt fræðsla um söfnun og sáningu á birkifræi, tilgang og fyrirkomulag landsátaksins. Að því loknu verður haldið af stað út í skóg og birkifræi safnað.

Hvernig fræi er best að safna?

Birkitré eru jafn ólík og þau eru mörg. Við fræsöfnun borgar sig að hafa í huga að tréð sem í framtíðinni vex upp af fræinu, verður líklega mjög líkt trénu sem fræið er tínt af. Mikill munur er á því hve öflug mismunandi yrki (erfðahópur) eru - hve hratt þau vaxa, hve hátt, hvort þau eru bein eða kræklótt, þol gagnvart sjúkdómum og fleira.

Mest af birkifræi í Vesturbyggð

Síðustu daga hefur verið unnið að því að kortleggja hversu mikið birkifræ finnst á trjám vítt og breitt um landið. Magn birkifræja í ár er ekki með því besta sem sést hefur á höfuðborgarsvæðinu og þarf aðeins að hafa fyrir því að finna tré með sæmilegu fræmagni. Þar á því vel orðatiltækið „leitið og þér munuð finna“.

Lítið er um fræ bæði á Norður- og Austurlandi en reytingur á Suður- og Vesturlandi. Í Vesturbyggð má aftur á móti víða finna talsvert magn fræja en minna annars staðar á Vestfjörðum. Því er ástæða til að hvetja íbúa á sunnanverðum Vestfjörðum sérstaklega til dáða í ár.

Birkiskógar þeki fimm prósent landsins árið 2030

Landsátakið „Söfnum og sáum birkifræi“ fer fram í fjórða skipti í ár. Þjóðin tók vel við sér þegar fyrst var efnt til átaksins árið 2020. Mikið magn fræja hefur safnast á síðustu árum og það notað til að rækta upp stór uppgræðslusvæði.

Sem kunnugt er stendur yfir áratugur Sameinuðu þjóðanna um verndun og endurheimt vistkerfa um allan heim í þágu fólks og náttúru. Íslensk stjórnvöld hafa tekið svonefndri Bonn-áskorun sem er alþjóðlegt átak um endurheimt skóga undir hatti alþjóðlegu náttúruverndarsamtakanna IUCN í samstarfi við fleiri aðila. Markmið Íslands í þessari áskorun er að árið 2030 vaxi birkiskógar á 5% landsins, í stað 1,5% nú.

Verkefnið Söfnum og sáum birkifræi er liður í því að Ísland nái þessu markmiði. Tilgangurinn er að efla útbreiðslu birkiskóga, meðal annars með því að virkja almenning til söfnunar og dreifingar birkifræs en einnig að veita fræðslu til félagasamtaka, skóla, fyrirtækja og stofnana um vernd og endurheimt birkiskóga.

Fólk um allt land er hvatt til að leggja sitt að mörkum. Annað hvort með því að safna fræi og skila því á móttökustöðvar eða sá fræinu á beitarfriðuðum svæðum þar sem vilji er til að klæða land birkiskógi eða -kjarri. 

Hægt er að sækja öskjur í verslanir og þjónustustöðvar Bónus og Olís. Þar verða líka kassar sem skila má fræinu í.

Bakhjarlar verkefnisins

Bakhjarlar verkefnisins eru Prentmet Oddi, Bónus og Olís. Þá vinnur Landvernd einnig að því að virkja fólk til þátttöku og að verkefninu vinna ásamt Skógræktinni og Landgræðslunni, Skógræktarfélag Íslands og Skógræktarfélag Kópavogs, Lionshreyfingunni og Kvenfélagasambandi Íslands. Í Norður-Þingeyjarsýslu má sækja öskjur og skila fræi í verslunina í Ásbyrgi í Kelduhverfi.

Nánari upplýsingar veita

Auður Kjartansdóttir, framkvæmdastjóri Skógræktarfélags Reykjavíkur, 893-2200

Kristinn H. Þorsteinsson, framkvæmdastjóri Skógræktarfélags Kópavogs, 839-6700.

Á staðnum verða auk þeirra sérfræðingar sem fræða gesti og gangandi um birki. Meðal þeirra tveir vísindamenn sem gert hafa rannsóknir á birki og erfðaeiginleikum þess.

Þorsteinn Tómasson plöntuerfðafræðingur hefur stundað rannsóknir á birki og ræktað beinvaxin og hraðvaxta yrki. Hann er stjórnarmaður í Skógræktarfélagi Reykjavíkur og verður á svæðinu við opnun landsátaksins. Aðgengilega umfjöllun hans um birki má lesa hér: https://heidmork.is/birki-betula-ssp/

Aðalsteinn Sigurgeirsson er einn af höfundum umfjöllunar í nýjasta Riti Mógilsá, um tilraun á 50 mismunandi birkikvæmum, sem sett voru út 1998. Niðurstöðurnar sýna hve miklu arfgerð skiptir fyrir viðgang trjánna. https://www.skogur.is/is/rannsoknir/utgafa/rit-mogilsar  Aðalsteinn er fagmálastjóri Skógræktarinnar og stjórnarmaður í Skógræktarfélagi Reykjavíkur, og verður á svæðinu. Greinina má lesa hér: https://www.skogur.is/is/rannsoknir/utgafa/rit-mogilsar 

HEIMSÓKN ELDRI BORGARA Í GUÐMUNDARLUND 20. JÚNÍ

Hin árlega og geysivinsæla skemmtiferð eldri borgara í Kópavogi var farin í Guðmundarlund þann 20. júní í blíðskaparveðri.

Um 220 manns sóttu hátíðina sem er samstarfsverkefni Félags eldri borgara í Kópavogi, Skógræktarfélags Kópavogs og Kópavogsbæjar.

Glens og gaman hefur ætíð fylgt þessum góða hóp eldri borgara en boðið var upp á léttar veitingar, tónlistin var í höndum Gleðigjafanna þeirra Gulla, Sigga sem með aðstoð Ingvars þöndu nikkurnar og söngur fólksins ómaði um allan lundinn.  Stuttar og hnitmiðaðar ræður fluttu þau Ásdís Kristjánsdóttir bæjarstjóri Kópavogs, Þröstur Magnússon formaður Skógræktarfélags Kópavogs og Margrét Halldórsdóttir nýkjörin formaður Félag eldri borgara í Kópavogi og var gerður góður rómur að ræðumönnum.

Sjá einnig hér: Frétt á heimasíðu FEBK

ÚTIVISTAR - OG FJÖLSKYLDUDAGUR 27. Júní 2023

Þriðjudaginn 27. júní verður haldinn í samstarfi Skógræktarfélags Kópavogs og Kópavogsbæjar undir merkinu Líf í lundi þar sem hvatt er til hreyfingar, samveru og skóga- og náttúruupplifunar. Viðburðurinn Líf í lundi verður nú haldinn í sjötta sinn og fer fram í kringum Jónsmessuna víða um land.

DAGSKRÁ

Dagskrá dagsins hefst kl 17:00 þar sem safnast verður saman í Fræðslusetrinu í Guðmundarlundi í Leiðarenda 3 og verður heitt á könnunni. Fljótlega verður gengið upp á Vatnsendaheiði undir leiðsögn og hugað að gróðri og sögu.

Á heiðinni verður horft til framtíðar og gróðursettar plöntur í þágu aukinna lífsgæða.
Skógrækt er góð leið til að binda CO2 úr andrúmsloftinu til langs tíma en um leið er verið að stuðla að jarðvegsvernd. Sveppum og mordýrum í jarðvegi fjölgar vatnsmiðlun eflist og skógurinn opnar nýja möguleika til útivistar svo eitthvað sé nefnt.

Að gróðursetningu lokinni verður gengið til baka í Guðmundarlund.

*Athugið að þeir sem ekki treysta sér að ganga upp og Vatnsendaheiði en vilja taka þátt í gróðursetningum eða fylgjast með þá er hægt aka bifreið að gróðursetningar stað.

Að lokinni formlegri dagskrá geta þátttakendur í Líf í lundi dvalið áfram í Guðmundarlundi og bardúsað við ýmislegt skemmtilegt enda hefur lundurinn upp á margt að bjóða. Í lundinum er meðal annars 10 brauta frísbígolfvöllur, leiktæki og frábær 9 holu minigolfvöllur.
Inni í miðjum Guðmundarlundi er Hermannsgarður, lítill og vinalegur blómagarður, með steinabeðum, stígum og bekkjum og svo er það auðvitað skógurinn sjálfur sem bíður upp á mikla möguleika til leikja og útivistar.
Fyrir þá sem ætla að taka hring á iðjagrænum golfvellinum þá má benda á að hver og einn verður að taka með sér eigin golfkylfur og kúlur og það sama á við um frísbígolfvöllinn, að fólk verður að koma með sína diska.

Ekki eru allir sem rata í Guðmundarlund er einfaldast fyrir þá að fara inn á https://ja.is/ og slá inn Leiðarendi 3.

 

ELDRI BORGARAR Í GUÐMUNDARLUNDI 20 JÚNI 2023

Félagsmiðstöðvar eldri borgara í Kópavogi og Félag eldri borgara í Kópavogi efna til skemmtiferðar í Guðmundarlund þriðjudaginn 20. júní næstkomandi.   

Guðmundarlundur er afar vistlegt útivistarsvæði sem nýtur mikilla vinsælda almennings en svæðið hefur sterkt aðdráttarafl og hefur upp á margt að bjóða.
Gestgjafar í Guðmundalundi verða Skógræktarfélag Kópavogs og Kópavogsbær sem taka á móti gestunum milli klukkan 14:00 og 16:00.  

Glens og gaman hefur ætíð fylgt þessum góða hóp eldri borgara og verður  boðið verður uppá léttar veitingar, tónlist og fluttar stuttar ræður.  Aðgangur er ókeypis en skráning er nauðsynleg fyrir 16. júní vegna útvegunar veitinga og takmarkaðs sætaframboðs í rútu. Hjólastólabíla þarf að panta af þátttakendum. Þeir sem koma á einkabílum þurfa líka að skrá sig.

  • Rúta frá Gjábakka   kl.13.00

  • Rúta frá Gullsmára  kl.13.15

  • Rúta frá Boðanum   kl.13.45

Þeir sem koma á eigin vegum og rata ekki í Guðmundarlund  geta t.d. farið inn t.d. inn á www.ja.is og slá inn Leiðarendi 3 einning má nálgst kort með því að slá HÉR á.

Þátttökulistar liggja frammi á félagsmiðstöðvunum. Einnig má skrá þátttöku með því að senda tölvupóst á febk@febk.is

FJALLAHJÓLAMÓT Í GUÐMUNDARLUNDI 21. MAÍ 2023

Bikarmót Breiðabliks í ólympískum fjallahjólreiðum verður haldið í Guðmundarlundi í Kópavogi sunnudaginn, 21. maí 2023.

Um er að ræða braut sem liggur meðal annars um hluta af skógræktarsvæði í Guðmundarlundi en brautin er sett upp í samráði og samvinnu við Skógræktarfélag Kópavogs,  https://skogkop.is/.

Í aðdraganda mótsins eru hjólarar beðnir um að fara varlega þegar þeir fara um skóginn í Guðmundarlundi þar sem hún liggur í gegnum frisbígolfvöll. Áhorfendur og aðrir gestir eru einnig vinsamlegast beðnir að sýna aðgát á meðan á keppni stendur.
Upplýsingar um keppnina er að finna á eftirfarandi slóð. https://xco.breidablik.bike/

„MEINDÝR Á TRJÁGRÓÐRI“ 21. MARS

Stjórn Skógræktarfélags Kópavogs boðar til aðalfundar félagsins þriðjudaginn 21. mars 2023. Fundurinn hefst kl 19:30 á Leiðarenda 3 í Guðmundarlundi í Kópavogi.
Dagskrá fundarins er samkvæmt lögum félagsins.
Lög félagsins má nálgast á vef félagsins www.skogkop.is

Að aðalfundi loknum flytur Guðmundur Halldórsson skordýrafræðingur erindið „Meindýr á trjágróðri“

Guðmundur er vel þekktur fræðimaður á sínu sviði og það verður áhugavert að fá að heyra hvað hann hefur fram að færa.

FRÆÐSLUFUNDUR UM GRÆNA STÍGINN 3. MARS

Skógræktarfélag Íslands og svæðisskipulagsnefnd höfuðborgarsvæðisins boða til fræðslu- og kynningarfundar um Græna stíginn.

Fundurinn verður haldinn í fundarsal Arion banka, Borgartúni 19 í Reykjavík, föstudaginn 3. mars næst komandi kl. 13-17.

Allir eru velkomnir og aðgangur er ókeypis. Skráning á fundinn er á netfangið skraning@skog.is og er skráningarfrestur til 1. mars.

Taka þarf fram hvort mætt verði á staðinn eða fylgst með í streymi. Sendur verður hlekkur fyrir streymið þegar nær dregur.

Nánari upplýsingar á heimasíðu Skógræktarfélags Íslands. https://www.skog.is/fraedslufundur-um-graena-stiginn/

Fagráðstefna skógræktar 2023

Fagráðstefna skógræktar 2023 verður haldin á Ísafirði 29.-30. mars 2023. Þema ráðstefnunnar verður „Skógrækt á tímum hamfarahlýnunar“.

Þetta er tveggja daga ráðstefna og er fyrri dagurinn helgaður þema hennar. Síðari dagurinn er vettvangur fjölbreyttra erinda og kynninga á málefnum sem snerta skógrækt, skógrannsóknir, skógtækni og skyld efni.

Auglýst hefur verið eftir erindum og veggspjöldum á dagskrá ráðstefnunnar. Frestur til að skila inn tillögum að erindum er til 17. febrúar en hægt er að skila inn tillögum að veggspjöldum til 10. mars.

Úr Tunguskógi í Skutulsfirði. Ljósmynd: Áskell Þórisson

AÐALFUNDUR SKÓGRÆKTARFÉLAGS ÍSLANDS 1.-3. SEPTEMBER

Aðalfundur Skógræktarfélags Íslands er haldinn að hausti til ár hvert. Á fundinum er kosið í stjórn félagsins, lagabreytingar afgreiddar þegar það á við og fjallað um margvísleg málefni sem snerta skógræktarfélögin í heild eða skógrækt almennt.

Einstök skógræktarfélög skiptast á að vera gestgjafar fundarins og því er fundarstaður breytilegur milli ára. Gefur það skógræktarfélögunum tækifæri til að kynna starfsemi síns félags og fræðast um starfsemi annarra félaga. Aðalfundurinn er einnig mikilvægur félagslegur vettvangur, þar sem þátttakendum gefst kostur á að viðhalda og endurnýja kynni við gamla og nýja félaga innan skógræktarhreyfingarinnar.

Aðalfundur Skógræktarfélags Íslands 2023 verður haldinn á Patreksfirði dagana 1.-3. september 2023 og eru Skógræktarfélög Patreksfjarðar, Bíldudals og Tálknafjarðar gestgjafar fundarins.

Þeir félagsmenn Skógræktarfélags Kópavogs sem hafa áhuga á að sækja fundinn eða fá nánari upplýsingar geta sent póst á Skógræktarfélag Kópavogs - skogkop@gmail.com

ANDLÁT

Gísli Óskarsson fyrrum stjórnarmaður Skógræktarfélags Kópavogs er fallinn frá 75 ára að aldri.
Meðfylgjandi er andlátsfrétt Gísla sem birt var í Morgunblaðinu.

Skógræktarfélag Kópavogs vottar fjölskyldu, vinum og aðstandendum samúðar.