AÐALFUNDUR 2022

Ársskýrsla Skógræktarfélags Kópavogs flutt á aðalfundi 29. mars 2022

 

Aðalfundur Skógræktarfélags Kópavogs 2021 haldinn 27. maí að leiðarenda 3 í Guðmundarlundi.

Í stjórn félagsins sitja.

·         Þröstur Magnússon formaður

·         Kristján Jónasson varaformaður

·         Sigrún Óskarsdóttir gjaldkeri

·         Loftur Þór Einarsson ritari

·         Jón Ingvar Jónasson meðstjórnandi

·         Hrefna Einarsdóttir varamaður     

Kristinn H. Þorsteinsson er starfsmaður félagsins.

Haldnir 6 stjórnarfundir á starfsárinu.

Daginn fyrir aðalfundinn í maí 2021 mættu í Guðmundarlund yfir 50 manns, sumarstarfsmenn frá Kópavogsbæ á námskeið og til skráninga.

Sem fyrr voru komnir saman ólíkir einstaklingar og hópar á öllum aldri. Skólafólk flest í yngri kantinum og eldri einstaklingar frá mismunandi löndum og menningarheimum. Tungumálin sem ómuðu í Guðmundarlundi sumarið 2021 voru fjölbreytt. Um 90 manns voru við störf hjá skógræktarfélaginu yfir sumartímann. Margir entust út allt sumarið en aðrir voru stutt og um suma vissi maður varla hvort þau væru að koma eða fara.

Frá Sambýlinu í Dimmuhvarfi komu íbúar og tóku þátt í verkefnum í Guðmundarlundi.

Í samstarfsverkefni Kópavogsbæjar og Skógræktarfélags Kópavogs voru gróðursettar um 19.000 trjáplöntur í Landgræðsluskóga og uppgræðslu í Selfjall í Lækjarbotnum. Auk þess sem sáð var birkifræi í vesturfjall Selfjalls sem einnig ber heitið Selfjallsháls.

Sumarið 2020 var aðallega gróðursett í norðurhluta Selfjalls og að mestu í suð-austur hluta svæðisins í fjallinu. Þær plöntur komu illa undan vetri vorið 2021 sérstaklega barrviðurinn en birkiplönturnar sem voru flestar illa kalnar  höfðu þó lifandi brum rétt ofan við rótarhálsinn og verður fróðlegt að sjá hvernig þær plöntur koma undan vetri núna í vor. Frostlyfting var nánast engin enda borið að öllum plöntunum ýmist gras eða hrossaskítur til að verjast frostlyftingu en svæðið skilar öllum plöntum upp á yfirborðið ef ekki er borið að þeim.  

Í Lækjarbotnum voru felldar trjáplöntur með fram veginum inn á sumarhúsasvæðið sem voru farnar að trufla umferð með greinum sínum og snjósöfnun á vegi var talsverð yfir vetramánuðina. Hreinsað var til á um 1,3 km kafla og var farið um og yfir tvö metra út fyrir vegöxl. Öllum trjám og greinum var rennt í gegnum kurlara. Kurlið fór að hluta til í stíga og önnur verkefni í Guðmundarlundi en einnig var það notað á svæðinu.

Í Lækjarbotnum eru víða skógarreitir eða skógarteigar frá árunum eftir 1993 með trjám um og yfir 7. metra að hæð. Þéttleiki var og er orðin víðast hvar mikill og aðgengi um skógana sumstaðar erfiður. Umhirða trjáreitana í gegnum tíðina hefur verið lítil.  Skógarsvæðin í Lækjarbotnum eiga gegna því megin hlutverki að vera ákjósanlegur vettvangur til útivistar.  

Við grisjun var sá háttur hafður á fella ekki tré sem einhverja hluta vegna höfðu sérstöðu eins og vaxtarlag, fegurð eða vera fágæt tegund á svæðinu. Sumsstaðar fengu tré að standa  þétt saman og mynda eina heild en öðrum stöðum var grisjað vel eða eins vel og hægt er án þess að eiga í hættu að skógurinn falli um í veðrum. Nokkur tré eiga að fá að njóta sín sem stakstæð tré í framtíðinni. Þannig á að viðhalda fjölbreytileika í þéttleika skógarins enda hann ekki hugsaður til viðarframleiðslu.

Stefnt er að því að í framtíðinni hafi svæðið hátt útivistargildi í fögru umhverfi. Að grisjunni og kurlun komu fagmenn frá Trjáprýði en Þráinn Gíslason skógræktarnemi annaðist og stjórnaði trjáfellingar meðfram vegum. Sumarstarfsmenn drógu til efni og voru fagmönnum innan handar. Það er enn mikið verk óunnið á svæðinu meðal annars í grisjun og stígagerð. Greinar og bolir fallinna trjáa voru látnir liggja í skóginum þar sem þau rotna en það er gott fyrir lífið í skóginum því það eykur náttúrulega hringrás næringarefnanna og eflir vistkerfi svæðisins.

Skátaskáli Garðbúa í Lækjabotnum var leigður undir sumarstafsfólkið fyrir kaffiaðstöðu og reyndist það vel.

Í Selfjalli eru nokkur félagasamtök með reiti til gróðursetninga. Félögin eru Kiwansklúbburinn Eldey, Lionsklúbburinn Eir, Rótaraklúbburinn Borgir og Rótarýklúbbur Kópavogs , Sorotímistaklúbburinn og Útivist.

Þann 14. júní komu saman félagar í Kópavogsdeild Sorotimistaklúbbsins og gróðursettu 100 stk af stálpaðum potta-  og hnausplöntum af birki og reynivið í reitinn í tilefni af 100 ára árstíð alþjóðasambandsins. Kristinn H. Þorsteinsson og Þráinn Gíslason frá skógræktarfélaginu sáu um fræðslu og aðstoðuðu við gróðursetningar. Félagið gróðursetti fyrst í reitinn 1993 og er þar vaxinn upp fallegur skógarreitur.

Rótarýklúbburinn Borgir kom saman til gróðursetninga 27. maí og gróðursettu undir styrkri stjórn Guðríðar Helgadóttur garðyrkjufræðings. Þarna fóru niður fyrstu plönturnar en klúbburinn fékk reitnum úthlutað 2021.

Útivist fjölmenntu sem fyrr í Selfjall 8. september til gróðursetninga en klúbburinn fékk úthlutað reit vorið 2020.

Gróðursetning grunnskólabarna í Kópavogi er reglulegur þáttur í skólastarfinu en ár hvert fá þau plöntur úr Yrkjusjóði til ræktunar í Skólaskógum á Vatnsendaheiði. Settar voru niður um 1200 trjáplöntur í maí og júní undir handleiðslu Skógræktafélagsins. Sumarstarfsmenn báru áburð á allar plöntur í Skólaskógum.

Vatnsdropinn sem samstarfsverkefni Menningarhúsanna í Kópavogi, í Óðinsvéum í Danmörku og Haapsalu í Eistlandi fékk úthlutað reit á Vatnsendaheiði  haustið 2021. Hópur félaga komu saman undir stjórn Friðriks Baldurssonar og Svavars Sverrissonar og gróðursettu í reitinn bakkaplöntur. 

Gróðursetningar í Vatnsendaheiði hófust 1994. Víða voru tré farin að ganga inn á vegi og trufla umferð. Farið var um heiðina og meðfram öllum vegum og tré felld eða greinar fjarlægðar sem voru farin að skaga inn á vegi. Það þarf að að fara yfir allt svæðið í heild sinni í umhirðu,  gefa þeim trjám rými sem stefna í að hafa einhverja sérstöðu, grisja og fella á þann hátt að útivistagildi svæðisins eflist. Fyrirhugað er að fara í stígagerð á svæðinu og vonandi hefjast framkvæmdir sem fyrst.  Stígarnir verða unnir og lagðir með vélum en sumarstafsmenn skógræktarfélagsins ættu að nýtast í fínvinnunni í lokafrágangi. Hönnun stíganna var gerður fyrir 25 árum og bíða síns tíma.  

Guðmundarlundur er heimasvæði Skógræktarfélagsins, vistlegt útivistarsvæði sem nýtur mikilla vinsælda almennings en svæðið hefur sterkt aðdráttarafl og hefur upp á margt að bjóða.

Það var viðburðaríkur og ánægjulegur gróðursetningardagur á Líf í Lundi laugardaginn        26. júní á Vatnsendaheiði og í Guðmundarlundi.

Almenningi var boðið að taka þátt í gróðursetningum í Vatnsendaheiði og leggja sitt að mörkum í þágu samfélagsins. Kolefnisbinding með skógrækt er góð leið til að binda CO2 úr andrúmsloftinu til langs tíma en um leið er verið að stuðla að jarðvegsvernd. Sveppum og mordýrum í jarðvegi fjölgar, vatnsmiðlun eflist og skógurinn opnar nýja möguleika til útivistar svo eitthvað sé nefnt. 

Eftir gróðursetningar stóð þátttakendum til boða að slá inn árangur dagsins inn í kolefnisreiknivélina og meta þannig framlag sitt til umhverfismála.

En járnið skal að sjálfsögðu hamra á meðan það er heitt og því var blásið á ný til sóknar og dagskráin var endurtekin miðvikudagana 7. og 21. júlí. Viðburðurinn var haldinn í samstarfi við Skógræktarfélags Kópavogs og Kópavogsbæ og önnuðust Friðrik Baldursson garðyrkjustjóri og Kristinn H. Þorsteinsson framkvæmdarstjóri fræðslu og leiðsögn.

Félagsmiðstöðvar eldri borgara og Félag eldri borgara í Kópavogi efndu til skemmtiferðar í Guðmundarlund fimmtudaginn 15. júlí.  Gestgjafar voru Skógræktarfélag Kópavogs og Kópavogsbær sem tóku á móti gestunum milli klukkan 14:00 og 16:00 og buðu upp á léttar veitingar.  Formaður Skógræktarfélags Kópavogs Þröstur Magnússon, bæjarstjórinn í Kópavogi Ármann Kristinn Ólafsson og formaður Félag eldri borgara í Kópavogi Ragnar Jónason ávörpuðu gesti  sem voru hátt í 200. Leikarinn góðkunni Örn Árnason skemmti gestum og fékk viðstadda til að taka undir í söng svo undirtók í hlíðum. Eldri borgarar hafa óskað eftir að fá að sækja Guðmundarlund heim um miðjan júní í ár á svipuðum nótum og í fyrra.

Sunnudaginn 29. ágúst var haldið XCO bikarmót Breiðabliks í hjólreiðum. Brautin lá um Vatnsendahæð, að hluta til innan skógarins í Guðmundarlundi og við bílastæðin. Mótið tókst á allan hátt vel og kom Skógræktarfélagið að mótinu og aðstoðaði við gerð brautar. Miðstöð mótshaldara var í fræðslusetrinu að Leiðarenda 3 og voru Hrefna Einarsdóttir og Sigrún Óskarsdóttir frá skógræktarfélaginu mótshöldurum til aðstoðar. Sumarstarfsmenn hjá skógræktarfélaginu komu að vinnu við brautargerð og aðstoðuðu Breiðablik eins og kostur var.  Ákveðið hefur verið að næsta mót verði haldið síðla dags fimmtudaginn 19. maí.

Miðvikudaginn 22. september bauð Markaðsstofa Kópavogs til opinnar gönguferðar með upphaf og endi í Guðmundarlundi og var göngutími um 90 mínútur. Tilefnið var að kynna tillögur Markaðsstofunnar að merkingum á gönguleiðum í kringum Elliðavatn og út frá Guðmundarlundi í tengslum við verkefni sem Markaðsstofan er að vinna, að ósk ferðaþjónustuaðila í bænum. Einnig var gangan tengd við Evrópska samgönguviku sem stóð yfir dagana 16.-22. september. Kristinn H. Þorsteinsson frá skógræktarfélaginu veitti leiðsögn og í lok göngunnar bauð félagið upp á kaffi og meðlæti í húsakynnum Skógræktarfélagsins.

Ævintýri í Jólaskógi í Guðmundarlundi á aðventunni var haldið annað árið í röð. Dagskráin er tæplega klukkutíma löng sýning þar sem áhorfendur ganga í litlum hópum um skóginn í Guðmundarlundi, vopnaðir vasaljósum og hitta á ferðum sínum persónur úr jólafjölskyldu okkar Íslendinga, þau Grýlu, Leppalúða, jólasveinana og tröllasystkini þeirra. Þá var haldið jólatrjáaskemmtun í skóginum fyrir nokkra grunn- og leikskóla Kópavogs. Í fyrrasumar bjó skógræktarfélagið til sérstakt rjóður inni í skóginum og var jólatré staðsett í miðju rjóðurins ljósum prýtt. Var mikil ánægja með þetta fyrirkomuleg en inni í skóginum ríkir betra veðurfar þegar utan hans blása kaldir vindar.  Hátt í 10.000 manns komu í Guðmundarlund í desember og nutu lífsins.

Það er annasamt að reka útivistasvæði spölkorn frá þéttbýlinu og ekki alltaf tekið út með sældinni. Þegar veður er gott eða í það minnsta sæmilegt og ekki snjóskaflar til að klofa yfir þá eru nánast allaf einhverjir sem gera sér glatt kvöld eða glaða nótt í Guðmundarlundi um helgar og oft gerist það í friði og ró. Undanfarin tvö ár hefur það færst í vöxt svo um munar að ungt fólk stefni sjálfum sér og öðrum í Guðmundarlund til gleðskapar og þá einkum þegar vorar. Vinsældir Guðmundarlundar hjá skólafólki náði nýjum hæðum síðastliðið vor.  Eða eins og segir í skýrslu lögreglu þann 20. maí 2021 ( Tilvitun hefst ) „ Lög­regl­an fékk til­kynn­ingu um fjöl­mennt ung­linga­sam­kvæmi í Guðmund­ar­lundi í Kópa­vog­in­um skömmu fyr­ir miðnætti í gær. Talið er að um 200 ung­ling­ar hafi verið á svæðinu og marg­ar bif­reiðar.“ ( tilvitnun lýkur )

Ef þetta hefði verið eina samkvæmið þá hefði maður mátt vel við una. En það var ekki því allar helgar frá miðjum apríl og fram í júní  á síðasta ári voru þéttsetnar af ungu fólki, krökkum á grunnskólaaldri upp í fullorðna einstaklinga sem ráfuðu hér um sumir blindfullir og eða dópaðir, mölvandi flöskur, brjótandi borð eða salerni og ælandi út um allan skóg. Þegar fjöldinn er farinn að skipta fleiri tugum eða hundruðum hefur lögreglan lítið í fjöldann að gera. Hún getur einungis staðið hjá og verið sýnileg.

Árrisulir gestir Guðmundarlundar, einstaklingar, fjölskyldur eða hópar eiga að getað komið í lundinn til að njóta útivistar án þess að þurfa rótast hér í tómum vínflöskum og munntóbakspúðum. Það er gríðaleg vinna sem felst í því að halda svæðinu hreinu. En til þess að það gerist hafa fulltrúar skógræktarfélagsins mætt hér eldsnemma að morgni til að fara yfir svæðið og þrífa það og gera við. Það er ekki alltaf sem aðkoman er slæm en allof oft.

Tekin var saman tímafjöldi sem fór í að halda svæðinu hreinu um helgar og á rauðum dögum á árinu 2021. Það voru 300 klukkutímar eða sem samsvarar 40 dögum sem félagar lögðu á sig að vakna hvern einasta frí dag ársins fyrir utan 25. desember og fara um svæðið í sjálfboðavinnu. Þó færri tímar verði á þessu ári vegna ófærðar og veðra þá má reikna samt með 250 – 260 klukkustundum. Menn þreytast og gefast upp. Ef Guðmundarlundur er ekki vaktaður á þennan hátt mun hann einfaldlega falla af stalli og einstaklingar, fjölskyldur og hópar leita annað.

Á síðastliðnu ári fór mikil orka í að lagfæra það skemmt var og er það miður. Það sem var öllu skemmtilegra voru allar þær nýframkvæmdir og eðlilegar viðhaldsframkvæmdir. Af því helsta sem nefna má er að lagt var nýtt rafmagn í geymslugáma félagsins okkar og tenglar og ný ljós sett upp. Þá var lagt rafmagn út í lundinn og settir upp vandaðir rafmagnskassar  annars vegar hjá gerðinu þar sem jólatrjáaskemmtanir fóru fram í vetur og hinsvegar við grillhúsið. Lagfært var rafmagn í Nýja húsinu. Þá var lagt vatn frá brunni og að Grillhúsi sem kemur til með að auðvelda öll þrif í og kringum grillhúsið. Áfram var unnið við stígagerð í skóginum og settar niður um 300 runnaplöntur í skógarbotninn. Jarðvegskipti voru framkvæmd í kringum nokkrar körfur á Frisbígólfvellinum en vegna ásóknar þá hafði myndast moldarflag við körfurnar og í moldarinnar stað var sett grús. Þá voru borð og bekkir lagfærðir eins og kostur var en þar sem mikið var um skemmdir á árinu og fækkaði borðum og bekkjum verulega.  Gamla húsið krafðist talsverts viðhalds og spurning hversu lengi það hangir uppi eða hvenær verður stigið niður úr gólfinu. Öll leiktæki fyrir utan þau nýju sem sett voru niður í fyrra eru ekki upp á marga fiska en verða endurnýjuð fljótlega því þau fengu náð í augum verkefnisins Okkar Kópavogur.  Það var í fjórða sinn núna í vetur sem íbúar í Kópavogi gátu kosið inn verkefni sem voru hugmyndir bæjarbúa.  

Það eru þrjú verkefni sem koma til framkvæmda í ár eða á næsta og snerta starfsemi okkar. Fyrst er þar að nefna að leiktæki verða sett upp í Guðmundarlundi,  Þá verður gerður malarstígur á milli Boðaþings og Guðmundarlundar og setja á niður ruslatunnur í hverfinu  og ekki óeðlilegt að einhverjar verði settar niður í Guðmundarlundi þar sem ætla má að fá útivistasvæði í Kópavogi njóti sömu vinsælda og Guðmundarlundur hvað fjölda varðar. 

Gras á flötunum í Guðmundarlundi kom ekki vel undan vetri og var kalið á stórum svæðum. Hafist var strax handa að vori við viðgerðir, flatirnar rakaðar, losað um svörðinn, sáð og borið á. Var þetta gert þrisvar sinnum yfir sumarið en grasið átti mjög erfitt uppdráttar vegna gífurlegrar aðsóknar gesta í Guðmundarlundi. Þetta gerist árlega enda liggur vatn og ís yfir stórum hluta svæðisins talsverðan tíma ár hvert og gras kafnar. Aukin umferð gesta um Guðmundarlund þýðir aukið álag. Við erum á þolmörkum og þurfum að horfast í augu við það.

Fossá í Hvalfirði er skógræktarjörð sem Skógræktarfélag Kópavogs á til helminga á móti Skógræktarfélögum í Mosfellsbæ, á Kjalarnesi og í Kjósarhreppi en þau félög skipta á milli sín hinum helmingi jarðarinnar. 

Ár hvert er félagsmönnum skógræktarfélaganna sem og öðrum boðið að mæta um tvær helgar í desember og höggva eigið jólatré gegn sanngjörnu gjaldi. Skógræktarfélag Kópavogs hefur mannað aðra helgina á móti hinum félögunum. Þá hafa félagsmenn Skógræktarfélags Kópavogs fellt hærri tré og eru þau meðal annars seld til Kópavogsbæjar sem torgtré. Fyrir síðastliðin jól voru engin torgtré felld á Fossá, Þau voru tekin í Lækjarbotnalandi.

Eins og fram hefur komið áður þá tóku Skógræktin og Landgræðslan árið 2020 höndum saman og óskuðu eftir stuðningi landsmanna við að breiða út birkiskóga landsins. Skógræktarfélag Kópavogs tók verkefnið að sér að ósk Skógræktarinnar og Landgræðslunnar, sjá um fræðslu og taka á móti fræi og annast dreifingu þeirra bæði í þau lönd sem félagið hefur aðgang að eða koma þeim í hendur annarra í öllum landshlutum. Í apríl mánuði 2021 var starfsmaður Skógræktarfélags Kópavogs tilbúinn að hefja fræðslu á sviði umhverfismála þar sem megin áherslan væri lögð á jarðvegsvernd, endurheimt vistkerfa og kolefnisbindingu með birki og kynningu á verkefninu Landsátak í söfnun og sáningu birkifræja.
Vegna takmarkana á skólastarfi riðlaðist margt og starfsemin hefur farið hægar af  stað en fyrirhugað var.
Í lok maí fór fram fræðsla í grunnskólanum á Laugarvatni, myndræn og verkleg.
Vinnuskóli Kópavogs fékk myndræna og verklega kennslu seinni part júnímánuðar og fram í
júlí. Kennarar í Borgarholtskóla, félagar í Lions í Kópavogi og á Akranesi sem og starfsfólk
Íslandsbanka og Tempo ehf nutu fræðslu í september. Á Landsþingi Kvenfélagasambands
Íslands (KÍ) í október gafst tækifæri á að kynna Landsátakið.
Í samstarfi við Kvenfélagasambands Íslands og Lions er verið að undirbúa heimsóknir á fundi klúbba sem víðast á landsbyggðinni og kynna verkefnið og hvetja félagsmenn að taka þátt í þessu fjöldskylduverkefni að „Safna og sá“
Þótt farsóttin hafi vissulega sett strik í reikningin mun Skógræktarfélagið halda sínu striki og
vinna að því að koma inn fræðslu sem víðast. Skógræktarfélagið er í sambandi við nokkra skóla sem áhuga hafa á að tengjast verkefninu þegar horfir til betri tíðar og samstarf félagsins við Kvenfélagasambandið og Lions ætti að opna okkur leið til að efla verkefnið sem fjölskylduverkefni.

Á árinu bart félaginu gjafir frá vinum og fjölskyldu Hauks Hannibalssonar í tilefni af 80 ára afmæli hans. Haukur var ötull skógræktarmaður og félagi í Skógræktarfélagi Kópavogs. Hann var einn af frumherjum skógræktar á Fossá og lagði landinu lið, komandi kynslóðum til heilla. Stjórn Skógræktarfélagsins í samvinnu við fjölskyldi Hauks ákvað að gróðursetja myndarlegt reyniviðatré og setja við hlið þess skjöld með nafni Hauks og upplýsingar um framlag hans til skógræktar.  Tréð verður gróðursett með viðhöfn í sumarbyrjun.

Þá komu gjafir frá vinum og fjölskyldu Helgi Hálfdánardóttur ekkju Guðmundar Jónssonar í BYKO og vvar ákveðið að lagfæra umhverfið í kringum styttu Guðmundar í Guðmundarlundi, helluleggja og setja upp bekk. Verður það gert í sumar.

Óvenju snjóléttur, hlýr og þurr vetur var allt árið 2021 sem gerði það að verkum að flest alla daga var hægt að spila frisbígolf eða minigolf á iðgrænum golfvellinum þó vetur væri. Vöxtur gróðurs almennt var góður yfir sumartímann og haustið hagstætt fyrir plöntur að þroskast.

Í byrjun febrúar síðastliðinn tók að snjóa á höfuðborgarsvæðinu að einhverju marki. Hvert óveðrið á fætur öðru dundi yfir og hefur verið meira og minna ófært í Guðmundarlund í rúman mánuð.  Þetta sýnir að erfitt verður að halda úti leigu í nýja húsinu eins og hugur manna stóð til og þarfnast því rekstur húsnæðisins endurskoðunnar.

Sem fyrr fór margt öðruvísi en vonir stóðu til vegna Covid. Þegar við horfum hugsanlega fram á nýja og betri tíma er lag að hrista rykið af hugmyndum og bretta upp ermar. Það er að mörgu að huga og vonandi gefst tækifæri á að efla félagsstarfið, fjölga viðburðum og efla fræðslu til félagsmanna sem og til annarra Kópavogsbúa. Samstarf við Kópavogsbæ sem er skógræktarfélaginu mikilvægt hefur verið einstaklega gott og stöndum við núna í viðræðum um áframhaldandi samninga.

Stjórn og starfsmaður félagsins þakka öllum þeim sem lagt hafa starfsemi skógræktarfélags Kópavogs lið á einn eða annan hátt.

 

============================================

Fossárfélag

Aðalfundur fyrir árið 2021 hefur ekki verið haldinn og reikningar liggja ekki fyrir. Á siðasta aðalfundi sem haldinn var 15. september 2020 var gert grein fyrir fulltrúum eiganda í stjórn félagins.

Stjórn félagsins er þannig skipuð frá aðalfundi 2020.

Frá skógræktarfélagi Kópavogs

Kristinn H. Þorsteinsson – formaður

Kristján Jónasson - varaformaður

Karl M. Kristjánsson – ritari

Frá Skógræktarfélagi Mosfellsbæjar:

Bjarki Þór Kjartansson – gjaldkeri

Frá Skógræktarfélagi Kjósahrepps:

Kristján Oddsson – meðstjórnandi

Skógræktarfélagi Kjalnesinga tilnefndi engan í stjórn á aðalfundi 2020

Jólatrjáasala fór fram dagana  4. desember og aftur 11. og 12. desember milli kl 11:00 og 15:00. Þann 5. Desember féll jólatrjásala niður vegna aftakaveðurs. Sem fyrr og stóðu félagar vaktina tvær helgar. Skógræktarfélag Kópavogs annaðist sölu trjáa aðra helgina en hin félögin deildu með sér hinni helginni. Gekk salan þokkalega.

Skógræktarfélag Kópavogs hefur tekið torgtré fyrir Kópavogsbæ á Fossá undanfarin ár en það varð viðsnúningur á árinu 2020 því þá fækkaði töku trjáa að Fossá umtalsvert og 2021 voru engin tré tekin. Skógræktarfélag Kópavogs tók flest sín tré í Lækjarbotnum.

Sótt var um styrk til plöntukaupa í Vorvið og var félaginu úthlutað 450 þúsund krónur. Plöntur komu frá Landgræðsluskógum 6500 stk og voru gróðursettar voru um 8000 plöntur á Fossá síðast liðið haust.

Markaðsstofu Vesturlands vann að því síðastliðið sumar við það að GPS trakka gönguleiðir á Vesturlandi og meðal annars á Fossá. Sótt var um að markaðsetja gönguleiðir og setja inn upplýsingar inn á kort. Var það samþykkt Eigendur jarðarinna veiti sitt samþykki með þeim fyrirvara að kortlagning hafi ekki áhrif á notkun slóða og vega á jörðinni. Karl M. Kristjánsson oddiviti sveitarinnar fylgir þessu máli eftir.

Það er að ýmsu sem þarf að huga vegna reksturs Fossár og mun formaður Skógræktarfélags Kópavogs ræða þau mál í erindi seinna í kvöld.

Fh. Fossá, Skógrækrafélags

Kristinn H. Þorsteinsson formaður.

DAGSKRÁ AÐALFUNDAR 29. MARS 2021

Stjórn Skógræktarfélags Kópavogs boðar til aðalfundar félagsins sem haldinn verður þriðjudaginn 29. mars 2022,  kl 20:00 í Guðmundarlundi, Leiðarenda 3 í Kópavogi.

 

Á dagskrá fundarins er:

1. Fundarsetning

2. Kosning fundarstjóra og fundarritara

3. Skýrsla stjórnar

4. Reikningar félagsins

5. Skýrslur nefnda

6. Félagsgjald

7. Lagabreytingar

8. Kosning stjórnar

9. Kosning skoðunarmanna reikninga

10. Önnur mál

 

Strax að loknum aðalfundi flytja Kristinn H. Þorsteinsson framkvæmdarstjóri og Þröstur Magnússon formaður Skógræktarfélags Kópavogs erindi í máli og myndum sem þeir nefna "Góður grunnur að byggja á til framtíðar"

AÐALFUNDUR SKÓGRÆKTARFÉLAGS KÓPAVOGS 29. MARS 2022

Stjórn Skógræktarfélags Kópavogs hefur ákveðið í ljósi núverandi stöðu í samfélaginu að boða til aðalfundar þriðjudaginn 29. mars 2022.

Komi upp sú staða að sóttvarnaraðgerðir verði hertar á ný áskylur stjórn Skógræktarfélags Kópavogs sér rétt til að fresta aðalfundi með stuttum fyrirvara.

 Dagskrá fundarins verður auglýst er nær dregur.

 Með kveðju

Stjórn Skógræktarfélags Kópavogs

Ævintýri í Jólaskógi

Ævintýri í Jólaskógi er í Guðmundarlundi á aðventunni, annað árið í röð.

Ævintýri í Jólaskógi er tæplega klukkutíma löng sýning þar sem áhorfendur ganga í litlum hópum um skóginn í Guðmundarlundi, vopnaðir vasaljósum og hitta á ferðum sínum persónur úr jólafjölskyldu okkar Íslendinga, þau Grýlu, Leppalúða, jólasveinana og tröllasystkini þeirra.

Nánari upplýsingar er að finna á slóðinni https://tix.is/is/event/12105/-vintyri-i-jolaskogi-vasaljosaleikhus/

 

HÖGGVIÐ YKKAR EIGIÐ JÓLATRÉ – FJÖLSKYLDUSTUND Í SKÓGINUM.

Jólatrjáasala verður á Fossá í Hvalfirði tvær helgar í desember þ.e
laugardaginn 4. og sunnudaginn 5. desember og aftur 11. og 12. desember milli
kl 11:00 og 15:00

Einstaklingum sem og starfsmannafélögum eða öðrum hópum gefst nú, eins og undanfarin ár, frábært tækifæri til að koma að Fossá í Kjós og ná sér í jólatré.  

Jólatré sem seld eru að Fossá kosta aðeins 6.500 allt að 2,5. metrum.

 Þegar komið er að Fossá er hægt að fá lánaða sög og leiðbeiningar starfsfólks um hvar megi sækja tré og hvernig skuli bera sig að. (Þeir sem eiga góða sög eru hvattir til að taka hana með sér).

Þegar tréð hefur verið valið og fellt stendur til boða aðstoð við að pakka trénu inn í net sé þess óskað.  Hægt er að greiða fyrir tréð/ trén hvort sem er með peningum, korti eða leggja beint inn á reikning.

Öll vinna við sölu trjánna er unnin í sjálfboðavinnu og er afrakstur sölunnar notaður til að gróðursetja fleiri tré á Fossá og styrkja svæðið enn frekar sem útivistarsvæði. 

 Skógurinn að Fossá er opinn skógur og öllum velkomið að njóta hans árið um kring.

Hvernig kemst ég að Fossá?

Jörðin Fossá er frekar innarlega í Hvalfirði. Beygt er af Vesturlandsveginum inn í Hvalfjörð að sunnanverður, skammt frá Hvalfjarðargöngunum.

Leiðin liggur inn Hvalfjörðinn og er farið yfir Laxá,  framhjá Hálsi í Kjós , Hvammsvík, og Hvítanesi þar sem gamla Bretabryggjan hangir enn uppi.

Næsta jörð við Hvítanes er Fossá og er svæðið vel merkt þegar komið er að.

Allir eru velkomnir í ævintýraland jólatrjánna að Fossá.

Nánari upplýsingar er hægt að fá í gegnum síma 839-6700 eða í gegnum netfangið skogkop@gmail.com

 

 

MÁLÞING: ÖLL Á SAMA BÁTI – LOFTSLAGSKREPPAN OG AÐGERÐIR Í ÞÁGU FRAMTÍÐAR

Málþing um loftslagskreppuna og framtíðina verður haldið í fyrirlestrarsal Þjóðminjasafns Íslands föstudaginn 29. október kl. 13.30–15.30 undir yfirskriftinni: Öll á sama báti – Loftslagskreppan og aðgerðir í þágu framtíðarinnar.
Vigdís Finnbogadóttir, fyrrverandi forseti Íslands, er heiðursgestur málþingsins sem haldið er á vegum Stofnunar dr. Sigurbjörns Einarssonar og Guðfræðistofnunar Háskóla Íslands, í samvinnu við samráðsvettvanginn Faith for Nature (https://faithfornature.org/)

Dagskrá:
Halldór Reynisson, verkefnisstjóri umhverfismála hjá Þjóðkirkjunni, setur ráðstefnuna og ræðir um Loftlagsmál, börnin og framtíðina

Erindi:
• Halldór Þorgeirsson, fulltrúi Andlegs þjóðarráðs bahá‘ía á Íslandi: Trú á vettvangi Sameinuðu þjóðanna.
• Halldór Björnsson, hópstjóri veðurs og loftslags hjá Veðurstofunni: Kynning á nýjustu skýrslu IPCC um loftslagsbreytingar.
• Guðfinna Th. Aðalgeirsdóttir, prófessor við Jarðvísindadeild H.Í: Nánar um IPCC skýrsluna: Hörfun jökla og hækkun sjávarstöðu eru afleiðingar loftslagsbreytinga af mannavöldum.

Örinnlegg:
• Tryggvi Felixson, formaður Landverndar.
• Hjördís Jónsdóttir, stofnandi Skógræktarfélagsins Ungviður.
• Hilmar Örn Hilmarsson, allsherjargoði.
• Evlalía Kolbrún Ágústsdóttir, fulltrúi frá Ungum umhverfissinnum.
• Axel Árnason Njarðvík í umhverfishópi þjóðkirkjunnar.
• Áróra Árnadóttir, nýdoktor við Umhverfis- og byggingarverkfræðideild Háskóla Íslands.
• Gunnar Hersveinn, athafnastjóri hjá Siðmennt.

Málþingsstjóri: Arnfríður Guðmundsdóttir, prófessor við Guðfræði- og trúarbragðadeild við Háskóla Íslands.

Málþinginu verður streymt og má finna það á slóðinni:
https://www.youtube.com/watch?v=aUstYiAHmJg

FJALLAHJÓLAMÓT Í GUÐMUNDARLUNDI 29. ÁGÚST 2021

Sunnudaginn 29. ágúst verður XCO bikarmót Breiðablik í hjólreiðum. Brautin liggur að hluta til innan skógarins í Guðmundarlundi og inn á bílastæðin og eftir veginum meðfram grenitrjáaröðinni í átt að Vatnsendaheiði. ( Sjá meðfylgjandi kort )

 Hjólreiðaklúbbur Breiðabliks og Skógræktarfélag Kópavogs biður alla til að sýna aðgát á meðan á mótinu stendur. Brautin innan skógarins er vel afmörkuð eins og sjá má eftirfarndi myndbandi breidablikhjol/videos/

 Brautin fer ekki inn á grasflatirnar og leiksvæðin í botni lundarins.

 Allir eru velkomnir að fylgjast með mótinu og njóta. Hjólreiðakeppnin hefst kl. 10:00 og henni líkur kl. 14:00.

Miðstöð mótshaldara verður í nýja húsi Skógræktarfélagsins að Leiðarenda 3.

 Allar upplýsingar um mótið má finna á þessari síðu https://sites.google.com/view/xco-2021

Og á Facebook síðu: https://fb.me/e/1d782RTSl

 

 

Gróðursetningardagur fjölskyldunnar 21. júlí 2021

Minnum á gróðursetningardag fjölskyldunnar á morgun miðvikudaginn 21. júlí kl 17:00

================================================

Góðursetningardagur fjölskyldunnar í Kópavogi verður haldinn í þriðja sinn á þessu sumri og verður gróðursett í þágu aukinna lífsgæða á Vatnsendaheiði á morgun miðvikudaginn 21. júlí. Dagskráin hefst kl. 17:00 við Fræðslusetrið í Guðmundarlundi, Leiðarenda 3.

Eftir gróðursetningar stendur þátttakendum til boða að slá inn árangur dagsins inn í kolefnisreiknivélina og meta þannig framlag sitt til umhverfismála.

Kolefnisbinding með skógrækt er góð leið til að binda CO2 úr andrúmsloftinu til langs tíma en um leið er verið að stuðla að jarðvegsvernd. Sveppum og mordýrum í jarðvegi fjölgar vatnsmiðlun eflist og skógurinn opnar nýja möguleika til útivistar svo eitthvað sé nefnt.

Að lokinni formlegri dagskrá geta þátttakendur í Líf í lundi dvalið áfram í Guðmundarlundi og bardúsað við ýmislegt skemmtilegt enda hefur lundurinn upp á margt að bjóða. Í lundinum er meðal annars 10 brauta frísbí gólfvöllur, leiktæki og frábær 9 holu minigolf völlur.

Inni í miðjum Guðmundarlundi er Hermannsgarður, lítill og vinalegur blómagarður, með steinabeðum, stígum og bekkjum og svo er það auðvitað skógurinn sjálfur sem bíður upp á mikla möguleika til leikja og útivistar.

Fyrir þá sem ætla að taka hring á iðgrænum gólfvellinum þá má benda á að hver og einn verður að taka með sér eigin golfkylfur og kúlur og það sama á við um frísbí gólfvöllinn að diskurinn til að kasta er á valdi hvers og eins.

Til að finna Guðmundarlund er einfaldast að fara inn á https://ja.is/

og slá inn Leiðarendi 3.

Viðburðurinn er haldinn í samstarfi Skógræktarfélags Kópavogs og Kópavogsbæjar.

Ferð eldri borgara í Guðmundarlund 15. júlí 2021

Félagsmiðstöðvar eldri borgara í Kópavogi og Félag eldri borgara í Kópavogi efna til skemmtiferðar í Guðmundarlund fimmtudaginn 15. júlí næstkomandi.   

Guðmundarlundur er afar vistlegt útivistarsvæði sem nýtur mikilla vinsælda almennings en svæðið hefur sterkt aðdráttarafl og hefur upp á margt að bjóða.
Gestgjafar í Guðmundalundi verða Skógræktarfélag Kópavogs og Kópavogsbær sem taka á móti gestunum milli klukkan 14:00 og 16:00.  
Boðið verður upp á rútuferðir frá öllum félagsmiðstöðvum Kópavogs og verður lagt af stað stundvíslega kl. 13:30. Fólk getur einnig komið í Guðmundalund á eigin vegum en til að finna lundinn er góð leið að fara t.d. inn á www.ja.is og slá inn Leiðarendi 3 og skoða kort.

Vegna veitinga þarf að skrá þátttöku í síðasta lagi mánudaginn 12. júlí á eyðblöð í félagsmiðstöðvunum í Kópavogi eða með því að senda tölvupóst á febk@febk.is

Við skráningu þarf sérstaklega að taka fram hvort þátttakandi ætli að nýta sér rútuna eða koma sér í Guðmundarlund á eigin vegum.  

Þeir sem þurfa á hjólastólabíl að halda er bent á að panta sér far með fyrirvara hjá Ferðaþjónustu fatlaðra í síma 515 – 2720.

Glens og gaman hefur ætíð fylgt þessum góða hóp eldri borgara og sem fyrr munu Gleðigjafarnir hinir einu og sönnu mæta og boðið verður uppá léttar veitingar.

Gróðursetningardagar fjölskyldunnar 7. og 21. júlí.

Það var viðburðaríkur og ánægjulegur gróðursetningardagur á Líf í Lundi á laugardaginn 26. júní á Vatnsendaheiði og í Guðmundarlundi.

Eftir gróðursetningar stóð þátttakendum til boða að slá inn árangur dagsins inn í kolefnisreiknivélina og meta þannig framlag sitt til umhverfismála.

Kolefnisbinding með skógrækt er góð leið til að binda CO2 úr andrúmsloftinu til langs tíma en um leið er verið að stuðla að jarðvegsvernd. Sveppum og mordýrum í jarðvegi fjölgar vatnsmiðlun eflist og skógurinn opnar nýja möguleika til útivistar svo eitthvað sé nefnt. 

En járnið skal að sjálfsögðu hamra á meðan það er heitt og því blásum við á ný til sóknar og ætlum að endurtaka gróðursetningar í þágu aukinnar lífsgæða á Vatnsendaheiði miðvikudagana 7. og 21. júlí kl. 17:00 og hefst dagskráin við Fræðslusetrið, Leiðarenda 3.  í Guðmundarlundi.

Viðburðurinn er haldinn í samstarfi Skógræktarfélags Kópavogs og Kópavogsbæjar.

LÍF Í LUNDI 26. JÚNÍ

Laugardaginn 26. júní verður haldinn útivistar- og fjölskyldudagur í samstarfi Skógræktarfélags Kópavogs og Kópavogsbæjar undir merkinu Líf í lundi  þar sem hvatt er til hreyfingar, samveru og skóga- og náttúruupplifunar. Líf í lundi verður nú haldinn í fjórða sinn og fer fram í kringum Jónsmessuna víða um land.

Dagskrá

Dagskrá dagsins hefst kl 10:00 þar sem safnast verður saman í Fræðslusetrinu í Guðmundarlundi í Leiðarenda 3 og verður heitt á könnunni. Fljótlega verður gengið upp á Vatnsendaheiði undir leiðsögn og hugað að gróðri og sögu.  

Á heiðinni verður horft til framtíðar og gróðursettar plöntur í þágu aukinar lífsgæða.  

Að gróðursetningu lokinni verður gengið til baka í Guðmundarlund þar sem boðið verður upp á rjúkandi Pylsur og Bulsur að hætti grillmeistarans í Fræðslusetrinu.

*Athugið að þeir sem ekki treysta sér að ganga upp og Vatnsendaheiði en vilja taka þátt í gróðursetningum eða fylgjast með þá er hægt aka bifreið að gróðursetningar stað.

Að lokinni formlegri dagskrá geta þátttakendur í Líf í lundi dvalið áfram í Guðmundarlundi og bardúsað við ýmislegt skemmtilegt enda hefur lundurinn upp á margt að bjóða. Í lundinum  er meðal annars 10 brauta frísbí gólfvöllur, leiktæki og frábær 9 holu minigolf völlur.

Inni í miðjum Guðmundarlundi er Hermannsgarður, lítill og vinalegur blómagarður, með steinabeðum, stígum og bekkjum og svo er það auðvitað skógurinn sjálfur sem bíður upp á mikla möguleika til leikja og útivistar.

Fyrir þá sem ætla að taka hring á iðgrænum gólfvellinum þá má benda á að hver og einn verður að taka með sér eigin golfkylfur og kúlur og það sama á við um frísbí gólfvöllinn að diskurinn til að kasta er á valdi hvers og eins.

 

Óskað eftir umsögnum um drög að landsáætlun í skógrækt

Umhverfis- og auðlindaráðuneytið hefur falið Skógræktinni að birta á vef sínum drög að landsáætlun í skógrækt 2021-2031 og óska þar eftir umsögnum. Hér eru því lögð fram til kynningar og umsagnar drög að landsáætlun í skógrækt ásamt drögum að umhverfismati þeirrar áætlunar. Jafnframt liggur fyrir minnisblað til ráðherra með minnihlutaáliti við drög að landsáætlun sem sömuleiðis birtist hér með til kynningar.

Umsagnarfrestur er til 18. júní 2021

 Sjá nánar frétt á heimasíðu Skógræktarinnar:

https://www.skogur.is/is/um-skograektina/frettir-og-vidburdir/frettir/oskad-eftir-umsognum-um-drog-ad-landsaaetlun-i-skograekt

 

_MG_1300.JPG

Ný stjórn Skógræktarfélags Kópavogs

Aðalfundur Skógræktarfélags Kópavogs var haldinn í Guðmundarlundi 27. maí 2021 kl 17:30

Á fundinum var Þröstur Magnússon kjörinn formaður stjórnar

Aðrir sem kjörnir voru í aðalstjórn voru:

·      Jón Ingvar Jónasson

·      Kristján Jónasson

·      Loftur Þór Einarsson

·      Sigrún Óskarsdóttir

Í varastjórn:

·      Hrefna Einarsdóttir

Á fyrsta stjórnarfundi eftir aðalfund skiptir stjórn með sér verkum og velur varaformann, ritara, gjaldkera og meðstjórnanda.

 

Skýrsla stjórnar frá aðalfundi 14. júní 2019 og skýrsla Fossárnefndar 2019 - 2020

Ársskýrsla Skógræktarfélags Kópavogs er á þessum aðalfundi félagsins 27. maí 2021 flutt fyrir rúm tvö ár, þ.e. frá aðalfundi 14. júní 2019 og fram á þennan dag, þar sem örlögin gripu inn í og ekki var framkvæmanlegt að halda aðalfund á árinu 2020.

Árið 2019 var félaginu og félagsmönnum viðburðaríkt. Félagið fagnaði hálfrar aldar afmæli og ákveðið hafði verið að aðalfundur Skógræktarfélags Íslands, landssamtaka skógræktarfélaga, yrði haldinn í Kópavogi í umsjón Skógræktarfélags Kópavogs.

Að því var stefnt að umhverfissetrið að Leiðarenda 3 yrði tilbúið til notkunar um mánaðamótin ágúst– september en tafir á framkvæmdum við húsið settu strik í reikninginn og drógu því miður kraft úr fyrirhugaðri fræðslustarfsemi félagsins á árinu.

Sem fyrr áttum við gott samstarf við Kópavogsbæ. Í samstarfsverkefni Kópavogsbæjar og Skógræktarfélags Kópavogs voru gróðursettar um 13.000 trjáplöntur í Landgræðsluskóga og uppgræðslu í Selfjall ofan Lækjarbotna. Einnig var unnið við að kurla grisjunarvið, lagfærðir voru stígar og framkvæmd almenn umhirða í Guðmundarlundi.

Að þessum verkefnum komu námsmenn í atvinnuátaki eldri en 18 ára og fólk í atvinnuátaki frá velferðarsviði. Ungmenni frá Vinnuskóla Kópavogs tóku þátt í gróðursetningum en það var hluti af árlegri umhverfisfræðslu þeirra.

Frá Sambýlinu í Dimmuhvarfi komu íbúar og tóku þátt í ýmsum verkefnum í Guðmundarlundi, til að mynda stígagerð.

Grunnskólar Kópavogs fá ár hvert plöntur úr Yrkjusjóði til ræktunar í Skólaskógum á Vatnsendaheiði.  „Markmið sjóðsins er að kosta trjáplöntun íslenskra skólabarna á grunnskólastigi á ári hverju“ stendur í skipulagsskrá Yrkjusjóðs. Með þessu er honum ætlað að kynna mikilvægi uppgræðslu, skógræktar og ræktunar almennt fyrir unga fólkinu í landinu og ala þannig upp ræktendur framtíðarinnar. Á árinu 2019 gróðursettu grunnskólabörn í Kópavogi undir handleiðslu Skógræktarfélags Kópavogs um 1.500 plöntur.

Undanfarin ár hefur verið haldinn vinnu- og fræðsludagur í Guðmundarlundi þar sem áhugasamir ræktendur hafa mætt og notið þess að stússast saman í garðinum part úr degi við beðahreinsun, plöntuskiptingar og gróðursetningar. Fyrir þá sem eru að stíga sín fyrstu spor í ræktun er viðburður þessi upplagt tækifæri til að læra til verka, skoða hönnun, staðsetningu og plöntuval en Skógræktarfélagið leggur til fagmenntað fólk í fræðslu og til leiðbeininga. Hermannsgarður er samvinnuverkefni Kópavogsbæjar, Skógræktarfélags Kópavogs og Garðyrkjufélags Íslands til minningar um Hermann Lundholm sem var garðyrkjuráðunautur bæjarins 1958-1989 og einn stofnenda Skógræktarfélags Kópavogs.

Að þessu sinni var Vinnu- og fræðsludagurinn í Hermannsgarði í Guðmundarlundi haldinn fimmtudaginn 25. júlí.

Líf í lundi er árlegur útivistar- og fjölskyldudagur í skógum landsins sem haldinn var 22. júní. Á þessum degi er almenningur hvattur til þess að stunda hreyfingu, samveru og upplifa skóga og náttúru landsins. Skógar landsins hafa þjónað mikilvægu hlutverki á síðustu misserum til útivistar og líklega sjaldan verið nýttir jafn mikið að vetri og í ár. Áhrif þeirra á andlega og líkamlega heilsu landans eru nú hvergi vanmetin. Fjöldi fólks kom í Guðmund­ar­lund í Kópavogi en boðið var upp á ýmis skemmti­atriði og leiki í skóg­ar­lund­in­um. Gróðursettar voru plöntur, grillaðar pyls­ur, steiktir klattar og boðið upp ketilkaffi að göml­um skógarsið.

Aðalfundur Skógræktarfélags Íslands, sem eru landssamtök skógræktarfélaga, var haldinn 30. ágúst – 1. september. Að þessu sinni var fundurinn haldinn í Kópavogi og var Skógræktarfélag Kópavogs gestgjafi fundarins, en það fagnaði þá 50 ára afmæli.

Á fundinum var boðið upp á fjölbreytt fræðsluerindi og farið í vettvangsferðir, þar sem skógarreitir og gróðurlendur í Kópavogi voru skoðuð.         

Eftirfarandi fræðsluerindi voru flutt á aðalfundinum.

·           Kópavogur með grænum augum - Friðrik Baldursson

·           Loftslagsskógar - Reynir Kristinsson

·           Birkikynbætur - leiðin að Heklu - Þorsteinn Tómasson

·           Avenza app GP - Björn Traustason

·           Skógrækt í 50 ár - Kristinn H. Þorsteinsson

·           Arboristar-nýir möguleikar í trjáhirðu - Orri Freyr Finnbogason

Dagskráin var öllum opin.

Umhverfissetrið í Guðmund­ar­lundi í Kópa­vogi var vígt við hátíðlega viðhöfn 30. ágúst.

For­seti Íslands, Guðni Th. Jó­hann­es­son, Ármann Kr. Ólafs­son bæj­ar­stjóri Kópa­vogs og Kristinn H. Þor­steins­son formaður Skóg­rækt­ar­fé­lags Kópa­vogs tóku til máls við at­höfn­ina. Þá gróður­settu börn úr Kópa­vogi tré í lund­in­um við hið nýja set­ur með dyggri aðstoð for­seta Íslands, bæj­ar­stjóra og full­trúa Skóg­rækt­ar­fé­lags Kópa­vogs.

Umhverfissetrið verður meðal annars nýtt af leik- og grunnskólum í Kópavogi en stefnt er að því að í Guðmundarlundi verði boðið upp á fyrsta flokks aðstöðu til útikennslu þar sem lögð verður sérstök áhersla á náttúrulæsi, umhverfis- og náttúruvernd og áhrif loftslagsbreytinga á umhverfið. Á vef Kópavogsbæjar er haft eftir Ármanni Kr. Ólafssyni bæjarstjóra að Umhverfissetrið sé í samræmi við þá áherslu sem bærinn hafi lagt á útikennslu í skólastarfi í Kópavogi en í bænum séu útikennslustofur við alla skóla. „Þá er áhersla á umhverfismál og áhrif loftslagsbreytinga mikilvæg og í takt við innleiðingu bæjarins á Heimsmarkmiðum Sameinuðu þjóðanna,“ er haft orðrétt eftir Ármanni á vígsludeginum.

Haldnir voru 14 stjórnarfundir og 6 vinnufundir á árinu sem var aukning frá fyrri árum og var ástæðan aukin vinna vegna aðalfundar Skógræktarfélags Íslands.

Stjórn Skógræktarfélagins var þannig skipuð eftir síðasta aðalfund 2019:

·         Kristinn H. Þorsteinsson formaður

·         Kristján Jónasson varaformaður

·         Hannes Siggason gjaldkeri

·         Þröstur Magnússon ritari

·         Jón Jakob Jóhannsson meðstjórnandi

·         Hrefna Einarsdóttir varamaður í stjórn.

 

·         og framkvæmdastjóri Bernhard Jóhannesson

Þegar árið 2020 rann upp horfði stjórn félagsins til bjartra tíma. Húsnæðið í Leiðarenda 3 var svo gott sem tilbúið og var í undirbúningi að auglýsa og leigja út húsnæðið til að standa undir ýmsum kostnaði sem því fylgir að reka hús og útivistarsvæði. Svo kom Covid sem breytti öllu. Fyrirhuguðum aðalfundi félagsins sem halda átti í lok mars var slegið á frest.

Bernhard Jóhannesson, starfsmaður félagsins, sagði stöðu sinni lausri í upphafi árs 2020. Félagið var ekki með starfsmann en þá kom fram tillaga frá stjórnarmanni að leitað yrði til formanns félagsins, Kristins H. Þorsteinssonar, hvort hann væri hefði áhuga á að skipta um vettvang og taka að sér stöðu framkvæmdastjóra félagsins. Kristinn ákvað að segja sig frá öðrum störfum og hóf störf í lok apríl.

Sú breyting varð á stjórn félagsins að Kristinn vék úr sæti formanns og undirritaður Kristján Jónasson tók sæti hans, Hrefna Einarsdóttir tók sæti varaformanns en aðrir hafa haldið sinni stöðu.

Í upphafi maímánaðar voru fjöldamörk samkomubanns hækkuð úr 20 í 50 manns.

Það var eins og opnað hefði verið fyrir flóðgáttir því í Guðmundarlund lagði aukinn fjöldi fólks leið sína til að stunda útiveru og lýðheilsu. Svæðið hefur sterkt aðdráttarafl enda hefur það upp á margt að bjóða. Það iðaði allt af lífi en í byrjun ágúst kom högg, ný Covid bylgja reið yfir og það dró snögglega úr komu gesta. Það ástand stóð ekki lengi því jafnt og þétt snéri fólk til baka þegar á leið og aðsóknin jókst aftur dag frá degi en leiga á grillstæðum hvarf nánast alveg. Það er auðvelt að stunda útiveru og bæta lýðheilsu í Guðmundarlundi þó margir séu í lundinum á sama tíma.

Gróðursetning grunnskólabarna í Kópavogi er reglulegur þáttur í skólastarfinu en ár hvert fá þau plöntur úr Yrkjusjóði til ræktunar í Skólaskógum á Vatnsendaheiði. Persónuleg reynsla og kynni nemanda af þessu starfi er fjársjóður sem á eftir að skila vöxtum þegar fram líða stundir. Á árinu 2020 gróðursettu grunnskólabörn í Kópavogi undir handleiðslu Skógræktarfélags Kópavogs um 1.600 plöntur en 8 skólar sóttu um að fá plöntur úr Yrkjusjóði þetta árið. Að lokinni gróðursetningu og fræðslu fóru börnin eins og áður niður í Guðmundarlund þar sem þau fengu útrás fyrir orku, gleði og skapandi leiki. Að lokum þáðu þau hressingu og hlóðu upp orku á ný. Reiknað er með því að þetta verkefni haldi áfram óbreytt. 

Samstarf milli Kópavogsbæjar og Skógræktarfélags Kópavogs vegna sumarstarfa 2020 var með ágætum eins og undanfarin ár. Aukið atvinnuleysi á vormánuðum var talvert einkennandi fyrir íslenskan vinnumarkað og var helsta ástæðan aukin eftirspurn ungs fólks eftir atvinnu þegar skólum lauk.

Skógræktarfélagið tók á móti fólki sem var í sumarvinnu hjá Kópavogsbæ, útdeildi verkefnum og annaðist fræðslu og verkstjórn. Þeir hópar sem komu til starfa voru ungmenni í atvinnuátaki námsmanna eldri en 18 ára, ungt fólk frá Vinnuskóla Kópavogs en það var hluti af umhverfisfræðslu þeirra. Einnig voru við störf í atvinnuátaki fólk frá Velferðarsviði Kópavogs sem komið er af léttasta skeiði og íbúar frá íbúðarkjörnum í Dimmuhvarfi og Austurkór. Undirbúningur undir áframhaldandi samstarf á svipuðum nótum er þegar hafinn.

Veðurfar sumarsins var með ágætum, hæfilega blautt, passlega vindasamt og þægilega heitt.

Gróðursettar voru um 35.000 trjáplöntur í Landgræðsluskóga og uppgræðslu í Selfjall ofan Lækjabotna. Einnig var unnið við að lagfæra stíga, laga bekki og borð, pússa og mála og þrífa grill og fjarlægja rusl, slá og hreinsa illgresi úr beðum og framkvæma almenna umhirðu í Guðmundarlundi svo eitthvað sé nefnt. Gróðursettir voru um 200 runnar af ýmsum tegundum í skógarbotn lundarins og er ætlunin að styrkja hann enn frekar með áframhaldandi gróðursetningum og sáningum runna og fjölæringa.

Vonir standa til að það verði hægt að koma niður 35.000 plöntum í Selfjall á árinu 2021.

Gras á flötunum í Guðmundarlundi kom mjög illa undan vetri og var kalið á mjög stórum svæðum. Hafist var strax handa að vori við viðgerðir, flatirnar rakaðar, losað um svörðinn, sáð og borið á. Var þetta gert þrisvar sinnum yfir sumarið en grasið átti mjög erfitt uppdráttar vegna gífurlegrar aðsóknar gesta í Guðmundarlundi. Það er alveg ljóst að það þarf að ráðast í umfangsmiklar framkvæmdir til að ræsa fram flatir í Guðmundalundi því þegar vatn leggst yfir svæðið og frýs þá kafnar grasið undir. Þetta er yfirstíganlegt verkefni en kostar vinnu og talsvert fé.

Eldri borgurum í Kópavogi var boðið í Guðmundarlund miðvikudaginn 1. júlí. Félagsmiðstöð eldri borgara og Félag eldri borgara í Kópavogi stóðu fyrir ferðinni. Skógræktarfélag Kópavogs og Kópavogsbær tóku á móti gestunum í Guðmundarlundi. Það var glatt á hjalla enda miklir gleðipinnar mættir sem þáðu léttar veitingar og dilluðu sér og sungu undir taktföstum leik harmonikkuleikara part af degi. Bæjarstjóri Kópavogs, Ármann Kr. Ólafsson, og formaður eldri borgara, Ragnar Jónasson, ávörpuðu gesti og létu gamminn geisa um það sem þeim var þá efst í huga. Það er mikill hugur hjá öllum sem að þessu komu að endurtaka leikinn og hefur húsið að Leiðarenda verið bókað fyrir móttöku þann 3. júní 2021.

Þann 10. júní efndu félagar úr Slysavarnarfélaginu Landsbjörgu og Skógræktarfélagi Íslands til gróðursetningarferðar í Áramótaskóg í Selfjalli í Lækjarbotnum.

Rótarskot eru ný leið Slysavarnafélagsins Landsbjargar til að styrkja sjálfboðastarf björgunarsveitanna í landinu. Um áramótin bjóða björgunarsveitirnar upp á sölu Rótarskots fyrir þá sem ekki vilja kaupa flugelda eða kaupa sitt lítið af hverju. Hvert Rótarskot gefur af sér tré sem gróðursett er með stuðningi Skógræktarfélags Íslands í nýjan Áramótaskóg Slysavarnafélagsins.

Af þessu tilefni voru 4.000 birkitré gróðursett í norðurhlíðar Selfjalls sem er í umsjón Skógræktarfélags Kópavogs en félagið annaðist undirbúning og stýrði verkefninu í Selfjalli ásamt Skógræktarfélagi Íslands. Sennilega munu þau Rótarskot sem seld voru um síðustu áramót verða gróðursett í Selfjall.

Ferðafélagið Útivist og Skógræktarfélag Kópavogs hófu samstarf á árinu. Ferðafélagið tók reit í fóstur í austurhlíðum Selfjalls í Lækjarbotnalandi. Markmiðið er að vinna að fjölbreyttri landgræðslu og gróðurrækt á svæðinu, setja upp bekki og fegra svæðið á annan hátt sem mun í framtíðinni nýtast félögum í Útivist auk gesta og gangandi.

Þetta verkefni er tilkomið vegna fjárgjafar Jóns Ármanns Héðinssonar til Útivistar og á að nýtast til skógræktar og fegrunar lands. Þeim var úthlutað reitur þar sem áður stóð um áratugaskeið skáli sem var í eigu ferðafélagsins Farfugla meðan það var og hét og kallaðist Heiðarból. Ætlunin er að halda því nafni um þennan reit.

Útivist hóf vinnu í Heiðarbóli fimmtudaginn 24. september þegar fjölmennur hópur félaga í Útivist safnaðist saman við Waldorfskólann í Lækjarbotnum og gekk upp og yfir Selfjall að Heiðarbóli til að kynna sér svæðið, huga að skipulagningu til framtíðar og gróðursetja trjáplöntur. Kristinn H. Þorsteinsson frá Skógræktarfélagi Kópavogs tók á móti göngufólki með skóflur og trjáplöntur og var félögum til handleiðslu. Að gömlum og góðum sið var síðan boðið upp á kaffi og kleinur.

Á skógræktarsvæðinu í Selfjalli í Lækjabotnum eru reitir sem félög fengu úthlutað fyrir nokkrum árum til að stunda trjárækt. Þau félög sem um ræðir eru Rótarýklúbbur Kópavogs og Soroptimistaklúbbur Kópavogs. Á síðasta ári fékk Lionsklúbburinn úthlutað reit og það var sannarlega glatt á hjalla 26. ágúst þegar Eirarkonur mættu í Selfjall og plöntuðu fyrstu trjánum í nýja lundinn en niður fór fallegt og veglegt linditré ásamt fjölda birki- og reynitrjáa. Framkvæmdastjóri Skógræktarfélags Kópavogs og Þráinn Gíslason skógræktarnemi aðstoðuðu Eirarkonur og héldu uppi fræðslu á staðnum. 

Í ár fengu Kiwanisklúbburinn Eldey og Rótarýklúbburinn Borgir úthlutað reit. Fleiri félög hafa sótt um reit og verða umsóknir þeirra afgreiddar á næstunni.

Á síðasta ári tóku Skógræktin og Landgræðslan höndum saman og óskuðu eftir stuðningi landsmanna við að breiða út birkiskóga landsins. Kópavogsbær og Skógræktarfélag Kópavogs tóku að sér að annast sáningu á öllu birkifræi sem safnaðist á höfuðborgarsvæðinu og sá því í skógræktarsvæði í Selfjalli í Lækjarbotnum sem er í umsjón Skógræktarfélags Kópavogs. Fulltrúi Kópavogsbæjar var Friðrik Baldursson garðyrkjustjóri og fulltrúi Skógræktarfélags Kópavogs Kristinn H. Þorsteinsson, framkvæmdastjóri félagsins. Lagt var fram fyrirkomulag sáningarinnar sem byggðist á því að bjóða almenningi að taka þátt í sáningunni og reyna að fá sem flesta til að leggja þessu lið. Formlegt upphaf sáninga í Selfjalli var 25. september en þá sáði bæjarstjóri Kópavogs birkifræjum með aðstoð nokkra barna úr Waldorfskólanum í Lækjarbotnum og fleirum. Í kjölfarið var almenningi var boðin þátttaka laugardagana 26. september og 3. október. Því miður þá rigndi mikið báða dagana skömmu áður en frædreifing hófst og hefur það án efa eitthvað dregið úr þátttöku. Alls tóku um 90 manns þátt í birkisáningum í Selfjalli haustið 2020. Í undirbúningi var að auglýsa og bjóða upp á áframhaldandi sáningar í október og var þegar búið að tryggja aðkomu fyrirtækja og félagasamtaka. Því miður sáum við okkur ekki fært að halda áfram og verkefninu var því frestað fram á vor þar sem samfélagið var ekki á góðum stað vegna Covid.

Verkefnið um söfnun og sáningu á birkifræi 2020 vakti mikla athygli og náði eyrum fjölmiðla. Landgræðslan og Skógræktin hafa leitað til Skógræktarfélags Kópavogs um að leiða þetta verkefni áfram á landsvísu á árinu 2021 og um leið að vinna að því að festa verkefnið í sessi til framtíðar. Vonandi verður birkiverkefnið áfram viðvarandi verkefni og fastur liður í samstarfi Kópavogsbæjar og Skógræktarfélags Kópavogs. Verkefnið fellur einkar vel að Heimsmarkmiðunum, sem er yfirstefna Kópavogsbæjar. Þessir aðilar myndu hvert haust standa fyrir söfnun birkifræja, t.d. meðal almennings og grunnskólabarna og standa fyrir sáningum vor og haust.

Aðfaranótt 24. október var gengið hér í Guðmundarlundi berserksgang. Margt var brotið og bramlað, til að mynda öskutunnur, bekkir og borð, salerniskassar og margt fleira. Tjónið var metið á 700 þúsund krónur. Tryggingar náðu ekki yfir öskutunnur, bekki og borð heldur eingöngu það sem eyðilagt var í salernishúsi. Tryggingafélagið VÍS sá aumur á Skógræktarfélaginu og bætti félaginu skaðann. Terra gaf félaginu góðan afslátt og þannig tókst okkur að kaupa betri tunnur og öflugri bekki og borð. Það hlýnar öllum um hjartarætur að finna slíka velvild í garð félagsins.

Hugmyndasöfnunin „Okkar Kópavogur“ var haldin í þriðja sinn 2019 á vegum Kópavogsbæjar. Alls komust 34 hugmyndir af samtals 100 áfram í rafræna kosningu og hlaut tillaga um leiktæki í Guðmundarlundi náð fyrir augum bæjarbúa. Í haust voru sett upp ný og skemmtileg leiktæki í Guðmundarlundi sem falla vel að skógarumhverfinu. Mikil ánægja er með þessi leiktæki og er mikil ásókn í þau.

Þann 25. september var farin fræðsluganga með félaga í Rótarýklúbbi Reykjavíkur – Breiðholt.
Um var að ræða haustferð klúbbsins og var gengið um Meltungureitinn í Fossvogsdalnum í Kópavogi og þar var meðal annars skoðaður Rósagarðurinn, Ávaxtagarðurinn og Yndisgarðurinn. Fararstjóri í ferðinni var framkvæmdastjóri Skógræktarfélags Kópavogs.

Fossá í Hvalfirði er skógræktarjörð sem Skógræktarfélag Kópavogs á til helminga á móti Skógræktarfélögum í Mosfellsbæ, á Kjalarnesi og í Kjósarhreppi en þau félög skipta á milli sín hinum helmingi jarðarinnar. 

Ár hvert er félagsmönnum skógræktarfélaganna sem og öðrum boðið að mæta um tvær helgar og höggva eigið jólatré gegn sanngjörnu gjaldi. Skógræktarfélag Kópavogs hefur mannað aðra helgina á móti hinum félögunum. Þá hafa félagsmenn Skógræktarfélag Kópavogs fellt hærri tré og eru þau meðal annars seld til Kópavogsbæjar sem torgtré. Í ár voru færri torgtré tekin á Fossá því nú eru að falla til við grisjun falleg tré í Lækjarbotnalandi og verður svo áfram um einhver ár ef haldið verður vel á spöðunum og hugað áfram að umhirðu skógarreitanna.

Í desember fór Skógræktarfélag Kópavogs í samstarf við fyrirtækið Jólasveinar.is. Grýla, Leppalúði, Hurðaskellir og Skjóða voru í Guðmundarlundi í desember og skemmtu ungum sem öldnum. Um var að ræða tæplega klukkutíma langa sýningu þar sem áhorfendur gengu í litlum hópum um skóginn í Guðmundarlundi, vopnaðir vasaljósum og hittu á ferðum sínum fyrrgreindar persónur úr jólafjölskyldu okkar Íslendinga. Sýningar þessar vöktu mikla athygli. Guðmundarlundur var bókstaflega fullur af fólki út úr hliði dag eftir dag. Við hjá Skógræktarfélagi Kópavogs lögðumst í þá vinnu að skrá og fylgjast með umferð fólks um lundinn í desember og niðurstaða talningar er að við vitum með fullri vissu að um 6.500 manns komu í Guðmundarlund og höfum sterkan grun um að við þá tölu megi bæta vel yfir 1.000 manns. Þá eru ótaldir þeir aðilar sem nýta sér Vatnsendaheiðina ofan Guðmundarlundar til útivistar. Jólasveinar.is hafa mikinn áhuga á að vera áfram í samstarfi við Skógræktarfélagið um að setja upp leikverk tengt jólum í desember og munum við hjá Skógræktarfélaginu ganga til viðræðna með opnum hug.

Stjórnin hefur kannað lauslega möguleika á  að setja upp teljara til talningar á fólki og ökutækjum við Guðmundarlund en slíkar talningar hjálpa mikið til við skipulag og vinnu við svæðið þegar fjöldinn er orðin eins mikill og raun ber vitni.

Sett var upp ljósum skreytt jólatré á flötina í Guðmundarlundi fyrir fyrstu helgi í aðventu og hundruð skólabarna sóttu lundinn heim þar sem dansað var kringum jólatréð og sungið jólalög með Bólu og jólasveinunum svo undir tók í fjöllum. Þessi skemmtilega tilraun tókst vel en með tilliti til þess að mikið vatn getur safnast saman á flötunum þá verður án efa skoðað hvort flötur sé á að halda þessu skemmtilega verkefni áfram í einhverri mynd.

Árið 2021 leit dagsins ljós og var þá hvergi hvítan díl að sjá. Veturinn var snjóléttur og vindur oft hægur. Gróður kom misgóður undan vetri og var helst að finna skemmdir á sígrænum runnum. Jörð hristist, eldur kom úr jörðu í næsta nágrenni við okkur og Covidið truflaði alla starfsemi lengst framan af.

Notkun á  grillaðstöðu og á húsi okkar hér í Leiðarenda var hverfandi enda var veturinn þannig að það var verið að panta og síðan afpanta, panta og afpanta.

Síðust dagar hafa þó verið viðburðaríkir því að það má með sönnu segja að Guðmundarlundur hafi heillað unga framhaldsskólanemendur sem flykktust hingað og nutu þess að drekka ýmsa drykki, æla, brjóta flöskur og spýta munntóbakspúðum um allar koppagrundir. Þá þurftu einhverjir óþroskaðir einstaklingar að sparka í klósettkassa í salernishúsinu og snúa við bekkjum og borðum svo eitthvað sé nefnt.

Minna fór fyrir fræðslumálum en vonir stóðu til. Í apríl fór framkvæmdastjóri félagsins í heimsókn til Lionsklúbbsins Eir og flutti fræðsluerindi um gróðurrækt. Þann 5. maí komu félagar í Útivist saman í Heiðarbóli í Selfjalli og gróðursettu undir leiðsögn.

Sumarstarfsmenn í vinnu hjá Skógræktarfélagi Kópavogs hófu flestir störf mánudaginn 24. maí en í sumar er gert ráð fyrir um 50 stöðugildum. Það sem er óvenjulegt að þessu sinni er hversu margir af erlendu bergi brotnir verða við vinnu í sumar en það er meirihluti. Meðalaldur hefur sjaldan ef nokkru sinni verið hærri og aldrei verið töluð jafn tungumál og nú.

Þurrkur og skraufaþurr gróður hafa gert mörgum lífið leitt undanfarnar vikur.  Sinueldar hafa loguð víða meðal annars á höfuðborgarsvæðinu. Eftir mikla bruna í Heiðmörk kviknaði eldur við bílastæðið við Guðmundarlund þann 10. maí og brann  um einn og hálfur hektari. Það fór betur en á horfðist því vegur sem þverar svæðið þar sem bruninn var hægði á framskriði eldsins og þegar slökkvilið kom náðu þeir fljótt tökum á eldinum og komu í veg fyrir að hann breiddist frekar út. Mikill hálmur af gömlum lúpínustönglum sem hefur hlaðist upp með tímanum í lúpínubreiðum er mikill eldsmatur og það sýndi sig þarna enda varð eldhafið mikið og hljóp hratt yfir. Trjágróðurinn sem skemmdist var stafafura, birki, gulvíðir og loðvíðir en heilt á litið telst skaði af brunanum ekki mikill enda svæðið ekki stórt. Hættustig vegna hættu á gróðureldum var lýst yfir daginn eftir eða þann 11. maí og er enn virkt. Þrátt fyrir nokkra úrkomu undanfarna daga hefur gróður ekki náð blotna nema rétt á yfirborði og þegar sólargeislar náðu að brjótast fram á ný varð gróður skraufaþurr á augabragði.

Við erum að sjá fyrir endann á þessu þurra tímabili því framundan er væta og þá mun græn slikja færast yfir landið og allt jarðlíf taka stakkaskiptum.  

Það er ljúfur vorboði ár hvert þegar börn frá grunnskólum Kópavogs mæta í Skólaskóga í Vatnsendaheiði til að gróðursetja í reiti sína. Lindarskóli og Smáraskóli riðu á vaðið í dag og mættu um 90 börn ´til að gróðusetja tré. Næstu daga mun mikill fjöldi barna taka þátt í að rækta land sér og öðrum til yndis og ánægju.

Framundan eru því spennandi tímar með kraftmiklu og áhugasömu fólki.

Þótt margt hafi verið öðruvísi en vonir stóðu til þá hefur tímabilið frá síðasta aðalfundi í heild sinni verið gott. Það er margt í pípunum og að mörgu að huga. Þessa stundina er verið að ganga frá skógræktaráætlun fyrir Lakheiði í Lækjarbotnalandi og verður hún kynnt á félagsfundi hjá félaginu fyrr en seinna.  Þarna liggja tækifæri fyrir Skógræktarfélagið til að fá verkefni og eflast. Það þarf að hlúa betur að Hermannsgarði og koma upp merkingum svo gestir og gangandi geti fræðst um hinar ýmsu tegundir fjölæringa í garðinum. Það hefur líka verið rætt að koma upp merkingum við ólík tré í Guðmundarlundi þar sem fram koma grunn upplýsingar um viðkomandi tegund. Þá eru skilti og merkingar á bílastæði farin að láta á sjá og þarfnast endurnýjunar.

Á borðinu liggja ýmsar hugmyndir um fræðslustarfsemi félagsins sem verður hugað að um leið og tækifæri gefst. Verkefnin eru mörg og margvísleg og því þörf á að meta stöðu félagsins og huga betur að hvar við stöndum því áherslur og starfsaðferðir Skógræktarfélags Kópavogs hafa breyst í takt við samfélagið í þau 50 ár sem félagið hefur starfað.

Stjórn Skógræktarfélags Kópavogs þakkar öllum fjölmörgu aðilum sem stutt hafa félagið á einn eða annan hátt.

Kristján Jónasson

Formaður Skógræktarfélags Kópavog

 ===========================================================================

Árskýrsla Fossá, skógræktarfélagfyrir árin 2019 og 2020

Fossá í Hvalfirði er 1.100 hektara skógræktarjörð  í eigu Skógræktarfélags Kópavogs, sem á helming jarðarinnar á móti Skógræktarfélögunum í Mosfellsbæ, á Kjalarnesi og í Kjósahrepps. Félagið er rekið á eigin kennitölu og á Skógræktarfélag Kópavogs þrjá fulltrúa í stjórn félagsins en hvert hinna félaganna 1 fulltrúa.

Aðalfundir félagsins voru haldnir 21. mars 2019 og sá síðari 15. september 2020.

Stjórn félagsins er þannig skipuð á árinu 2019 – 2020

Frá skógræktarfélagi Kópavogs:

·         Jón Jakob Jóhannesson - formaður

·         Karl M. Kristjánsson – meðstjórnandi

·         Kristinn H. Þorsteinsson – meðstjórnandi

 

Frá Skógræktarfélagi Mosfellsbæjar:

·         Bjarki Þór Kjartansson – gjaldkeri

 

Frá Skógræktarfélagi Kjalnesinga:

·         Baldvin Grétarsson – ritari

 

Frá Skógræktarfélagi Kjósahrepps:

·         Kristján Oddsson – meðstjórnandi

 

Það helsta sem gerðist á árinu 2019 að gróðursettar voru 660 plöntur sem íbætur í fjallið ofarlega og sunnarlega á gisið svæði. Vorið 2020 kom ósk frá Fetar, landssamtökum ferðaþjónustufyrirtækja í heilsárs-ferðaþjónustu á hálendinu um að fá að gróðursetja í land Fossá en félagið var þá að leita sér að landi til að koma saman, gróðursetja og kolefnisjafna faratækin sem þeir aka um á í atvinnuskyni. Framkvæmdarstjóri Skógræktarfélags Kópavogs tók á móti hópnum með plöntur og verkfæri og leiðbeindi við gróðursetningar. Um haustið komu saman fáeinir sjálfboðaliðar og gróðursettu greni sem vonandi eiga eftir að nýtast sem jólatré þegar fram líða tímar og önnur fá það hlutverk að binda það sem binda þarf.

Alls voru gróðursettar á Fossá 3000 greniplöntur árið 2020.

Grindarhlið var sett á veginn upp að Eystri Fossá og greiddi Fossárfélagið 50 % af kosnaði á móti eiganda Eystri Fossá.

Ljósleiðari var lagður um land Fossár og voru sett upp tengibox beggja vegna ár sem geta nýst eigendum á svæðinu.

Gert var tilboð í sumarhús Félags foreldra samtaka fatlaðra á Fossá  í október 2019 að upphæð 4. milljónir og var tilboðinu tekið. Fyrir tilboð höfðu stjórnarmenn í Fossárfélaginu ásamt öðrum farið nokkrar ferðir til að skoða húsið og meta ástand þess. Töldu menn að það væri í þokkalegu ástandi og þess virði að kaupa það og lagfæra. Húsið var þrífið og margt fór á haugana sem ónýtt var eins og dýnur, teppi, gluggatjöld og ískápur með talsverð loðnum  og illa þefandi mat.  Fljótlega þarf að huga að gleri og gluggum, bera á húsið og fleira.  Haustið 2020 var sett upp varmadæla í húsinu.

Jólatrjáasala fór fram í desember bæði 2019 og 2020 sem fyrr og stóðu félagar vaktina tvær helgar. Skógræktarfélag Kópavogs annaðist sölu trjáa aðra helgina en hin félögin deildu með sér hinni helginni. Gekk salan þokkalega, sérstaklega í desember 2020.

Farnar voru ferðir á Fossá bæði árin til að velja torgtré fyrir Kópavogsbæ. Trén voru síðan felld og flutt í Kópavog. Heldur fækkaði töku torg trjáa á Fossá 2020 því það hafa verið að koma upp vænleg tré í Lækjarbotnum og verður svo áfram ef félagið heldur vel á spöðunum og annast grisjun en flutningur trjáa er mun hagstæðari frá Lækjarbotnum en frá Fossá.

Breytingar urðu á stjórn félagsins á síðasta aðlafundi 15. september 2020.  Jón Jakob Jóhannesson og Baldvin Grétarsson gáfu ekki kost á sér til áframhaldandi og er þeim þakkað fyrir vel unnin störf í Þágu Fossá.

Á aðalfundinum var kjörin ný stjórn og er hún þannig skipuð fyrir árin  2020 – 2021

Frá skógræktarfélagi Kópavogs

·         Kristinn H. Þorsteinsson – formaður

·         Karl M. Kristjánsson – meðstjórnandi

·         Kristján Jónasson - Varaformaður

Frá Skógræktarfélagi Mosfellsbæjar:

·         Bjarki Þór Kjartansson – gjaldkeri

Frá Skógræktarfélagi Kjósahrepps:

·         Kristján Oddsson – meðstjórnandi

 

Frá Skógræktarfélagi Kjalnesinga:

·         Hafa ekki lagt fram í stjórn

 

Fh. Fossá, Skógrækrafélags

Kristinn H. Þorsteinsson formaður.

 

 

Árleg gróðursetning grunnskólabarna í Kópavogi er hafin

Gróðursetning grunnskólabarna í Kópavogi er reglulegur þáttur í skólastarfinu en ár hvert fá þau plöntur úr Yrkjusjóði til ræktunar í Skólaskógum á Vatnsendaheiði. Persónuleg reynsla og kynni nemanda af þessu starfi er fjársjóður sem á eftir að skila vöxtum þegar fram líða stundir. Árlega gróðursetja grunnskólabörn í Kópavogi undir handleiðslu Skógræktarfélags Kópavogs um og yfir 1.600 plöntur en 8 skólar sóttu um að fá plöntur úr Yrkjusjóði þetta árið. Að lokinni gróðursetningu og fræðslu fara börnin eins og áður niður í Guðmundarlund þar sem þau fá útrás fyrir orku, gleði og skapandi leiki.